ఇస్మార్ట్ బ్యూటీకి చైతూ 'థాంక్యూ' చెప్పబోతున్నాడా..?

యువ సామ్రాట్ అక్కినేని నాగ చైతన్య - డైరెక్టర్ విక్రమ్ కె కుమార్ కాంబినేషన్ లో ''థాంక్యూ'' అనే సినిమా తెరకెక్కుతున్న విషయం తెలిసిందే. శ్రీ వెకంటేశ్వ‌ర క్రియేష‌న్స్ బ్యాన‌ర్‌ పై దిల్‌ రాజు - శిరీష్‌ - హ‌ర్షిత్ రెడ్డి లు కలిసి ఈ చిత్రాన్ని నిర్మిస్తున్నారు. బీవీఎస్‌ రవి ఈ సినిమాకి స్టోరీ అందించడంతో పాటు డైలాగ్స్ కూడా రాస్తున్నారు. ప్రస్తుతం ఈ మూవీ షూటింగ్ రాజమండ్రి పరిసర ప్రాంతాల్లో జరుగుతోంది. ఇందులో చైతూ మూడు విభిన్నమైన గెటప్స్ లో కనిపిస్తాడని.. ముగ్గురు హీరోయిన్లతో రొమాన్స్ చేస్తాడని టాక్ నడుస్తోంది.

చైతన్య సరసన ఒక హీరోయిన్ గా ఇస్మార్ట్ బ్యూటీ నభా నటేష్ ని తీసుకుంటున్నారట. ఆల్మోస్ట్ ఆమెను ఫైనలైజ్ చేసారని.. త్వరలోనే దీనికి సంబంధించిన అధికారిక ప్రకటన కూడా రానుందని టాక్ వినిపిస్తోంది. ఇకపోతే ఈ చిత్రానికి లెజెండరీ సినిమాటోగ్రాఫర్ పీసీ శ్రీరామ్ వర్క్ చేస్తుండగా.. నవీన్ నూలి ఎడిటింగ్ బాధ్యతలు నిర్వర్తిస్తున్నారు. ఎస్ఎస్ థమన్ సంగీతం సమకూరుస్తున్నాడు. అక్కినేని ఫ్యామిలీకి 'మనం' వంటి క్లాసిక్ ని అందించిన విక్రమ్ కె కుమార్.. ఇప్పుడు మరోసారి చైతన్య కి సూపర్ హిట్ అందిస్తాడని ఫ్యాన్స్ నమ్మకంగా ఉన్నారు.