మళ్లీ ప్రయోగం ఎందుకు చైతూ?

అక్కినేని నాగచైతన్య సక్సెస్‌ కోసం చాలా కష్టపడుతున్నాడు. ఈమద్య వచ్చిన యుద్దం శరణం, శైలజా రెడ్డి అల్లుడు, సవ్యసాచి చిత్రాలు ఏమాత్రం ఆకట్టుకోలేక పోయాయి. మూడు సినిమాలు కూడా భారీ అంచనాల నడుమ తెరకెక్కినా ఏ ఒక్కటి కూడా చైతూ కెరీర్‌ కు హెల్ప్‌ కాలేక పోయాయి. వరుస ఫ్లాప్‌ లతో నాగచైతన్య కెరీర్‌ సాగుతున్న ఈ సమయంలో ‘మజిలి’ చిత్రంలో ఈయన నటిస్తున్న విషయం తెల్సిందే. భార్య సమంతతో కలిసి చైతూ మజిలి చిత్రాన్ని చేస్తున్నాడు.

ఈమద్య కాలంలో వరుసగా వస్తున్న పీరియాడిక్‌ కథాంశంల  మాదిరిగానే మజిలి చిత్రంలో కూడా కొన్ని పీరియాడిక్‌ సీన్స్‌ ఉంటాయట. 1990 నేపథ్యంలోని కొన్ని సీన్స్‌ సినిమాకు ప్రత్యేక ఆకర్షణగా నిలుస్తాయంటూ చిత్ర యూనిట్‌ సభ్యులు చెబుతున్నారు. అయితే కొన్ని పీరియాడిక్‌ సీన్స్‌ కొన్ని రెగ్యులర్‌ సీన్స్‌ అంటే ప్రేక్షకులు ఆధరించడం కష్టమే అనే అనుమానాలు వ్యక్తం అవుతున్నాయి. ఇక ఈ చిత్రంలో ఒక రీమిక్స్‌ పాట ఉంటుందని సినీ వర్గాల ద్వారా సమాచారం అందుతోంది.

‘మజిలి’ చిత్రంలో నాగార్జున ఒక సూపర్‌ హిట్‌ సాంగ్‌ ను రీమిక్స్‌ చేసే ఆలోచనలో చిత్ర యూనిట్‌ సభ్యులు ఉన్నారట. సవ్యసాచి చిత్రంలో నిన్ను రోడ్డు మీద సూచినట్లు లగ్గాయెత్తు.. అనే పాటను రీమిక్స్‌ చేయడం జరిగింది. ఇప్పుడు మరోసారి రీమిక్స్‌ తో చైతూ రాబోతున్న నేపథ్యంలో సినీ విశ్లేషకులు పెదవి విరుస్తున్నారు. ఇప్పటికే వచ్చిన రీమిక్స్‌ సాంగ్స్‌ ఆకట్టుకోలేక పోయాయి. చైతూ మళ్లీ ప్రయోగం చేయనున్న నేపథ్యంలో ఫ్యాన్స్‌ కూడా ఎందుకు బాబోయ్‌ అంటున్నారు. చైతూ సక్సెస్‌ కోసం చేస్తున్న ప్రయత్నాలు ఈసారైనా సఫలం అవుతాయో చూడాలి.