చైతూ నోట.. సాహసం మాట

‘ప్రేమమ్’ సినిమా ఆలోచన మొదలై ఇంకా ఏడాది కూడా కాలేదు. ఆ సినిమా మొదలై ఏడెనిమిది నెలలకే పూర్తయింది. ఇప్పుడు ప్రేక్షకుల ముందుకు కూడా వచ్చేస్తోంది. కానీ దీని కంటే ఏడాది ముందు మొదలైన నాగచైతన్య సినిమా ‘సాహసం శ్వాసగా సాగిపో’ సంగతే ఎటూ తేలట్లేదు. ఇదిగో అదిగో అంటూ నెలలు నెలలు గడిచిపోతున్నాయి. అసలు ‘ప్రేమమ్’ కంటే ముందే ఆ సినిమా విడుదల కావాల్సింది. కానీ వాయిదా పడిపోయింది. ఈ సినిమా గురించి దర్శక నిర్మాత నిర్మాత గౌతమ్ మీనన్ కానీ.. తెలుగులో సమర్పిస్తున్న కోన వెంకట్ కానీ ఏమీ మాట్లాడట్లేదు. చైతూ కూడా కొన్నాళ్లుగా నోరు విప్పట్లేదు.

ఐతే ‘ప్రేమమ్’ ప్రమోషన్ల కోసం వచ్చిన చైతూను మీడియా వాళ్లు వదల్లేదు. ‘సాహసం శ్వాసగా సాగిపో’ సంగతేంటో చెప్పమని గట్టిగా అడిగారు. దీంతో చైతూ దాని గురించి క్లారిటీ ఇచ్చాడు. ఈ సినిమా తెలుగు వెర్షన్ విషయంలో ఎలాంటి ఇబ్బందీ లేదని.. అన్ని కార్యక్రమాలూ పూర్తయ్యానని.. తాను తన పని ఎప్పుడో పూర్తి చేశానని.. ఇబ్బందంతా తమిళ వెర్షన్ తోనే అని చెప్పాడు చైతూ. ఈ మధ్యే ఓ పాట తీశారని.. దాంతో షూటింగ్ అంతా పూర్తయిందని.. ప్రస్తుతం డబ్బింగ్ వర్క్ జరుగుతోందని.. బహుశా నవంబర్లో రిలీజ్ ఉండొచ్చని చెప్పాడు చైతూ. ఐతే సినిమా ఎప్పుడు వచ్చినా ప్రేక్షకుల్ని ఆకట్టుకుంటుందని అతను ధీమా వ్యక్తం చేశాడు.

Like Us on Facebook : https://www.facebook.com/Tupakidotcom/