బాలయ్యను మళ్లీ టార్గెట్ చేసిన నాగబాబు..

మెగా బ్రదర్ నాగబాబు వీలు దొరికినప్పుడల్లా సోషల్ మీడియాలో వివాదాస్పద ట్వీట్లు పెడుతూ వార్తల్లో నిలుస్తుంటాడు. ఇదివరకే టాలీవుడ్ సినీ ఇండస్ట్రీ విషయంలో జోక్యం చేసుకొని వార్తల్లోకెక్కిన నాగబాబు.. ఎన్నో చర్చలకు తెరలేపాడు. ఇక ఇటీవల నందమూరి నటసింహం బాలయ్య తన పుట్టినరోజు సందర్భంగా ఒక రోజు ముందు తన తండ్రి ఎన్టీఆర్ నటించిన 'జగదేక వీరుని కథ' సినిమాలోని 'శివశంకరి.. శివానంద లహరి' అనే ఘంటసాల పాటను బాలకృష్ణ స్వయంగా ఆలపించారు. అయితే ఆ పాటకు సోషల్ మీడియాలో స్పందన కూడా మాములుగా లేదు. అయితే బాలయ్య పాట ఎలా ఉందనే సంగతి పక్కన పెడితే.. ఈ వయసులో ఈయన చేసిన సాహసాన్ని చూసి అభిమానులు మురిసిపోతున్నారు. ఏ మాత్రం మొహమాట పడకుండా బాలయ్య చేసిన ప్రయత్నాన్ని అభిమానులు నెటిజన్లు మెచ్చుకుంటున్నారు. అంతేగాక అదే పాట పై సోషల్ మీడియాలో సెటైర్లు కూడా వస్తున్నాయి.

ఈ నేపథ్యంలో నాగబాబు మళ్లీ కొత్త ట్వీట్ తో మరో వివాదానికి తెరలేపేలా కనిపిస్తున్నాడు. ఘంటసాల కాలం నాటి పాటల పై ఇండైరెక్ట్ కౌంటర్ వేసాడు. నాగబాబు నేరుగా ఈ పాట పై సెటైర్ వేసినట్లు అన్పిస్తుంది. బాలయ్య పేరు పెట్టకుండా.. ఆయన పాడిన పాట గురించి టాపిక్ తీయకుండా కొన్ని పాటలు రీమిక్స్ కంటే ఒరిజినల్స్ బాగుంటాయని బాంబ్ పేల్చాడు. "ఒక్కోసారి ఓల్డ్ సాంగ్స్ రీమిక్స్ కన్నా originals చాలా అద్భుతంగా ఉంటాయి.ఈ తరానికి ఘంటసాల గాత్ర మాధుర్యం విలువ ఈ పాటికె తెలిసుంటది.." అంటూ నాగబాబు చేసిన ట్వీట్ ఇప్పుడు సోషల్ మీడియాలో వైరల్ అవుతుంది. శివశంకరీ పాటను ఘంటసాల ఆలపించారు.. ఇప్పుడు అదే పాటను బాలయ్య కూడా పాడాడు. దాంతో నాగబాబు చేతికి పని పడ్డట్లే అయింది. ప్రస్తుతం ఈయన చేసిన ట్వీట్ వైరల్ అవుతుంది. మరి నాగబాబు ఇండైరెక్ట్ గా కౌంటర్ వేసినా ఎలాంటి వివాదానికి దారి తీస్తుందో చూడాలి!