ప్రామిస్ నిలబెట్టుకున్నానని నాని సంబరం

సరిగ్గా ఏడాది వెనక్కి వెళ్తే నాని దయనీయమైన పరిస్థితుల్లో ఉన్నాడు. ఏడాది ఆరంభంలో వచ్చిన పైసా - ఆహా కళ్యాణం.. రెండూ కూడా పెద్ద ఫ్లాపయ్యాయి. ఇంకో సినిమా ‘జెండా పై కపిరాజు’ అయితే విడుదలకే నోచుకోలేదు. దీంతో నాని కెరీర్ డైలమాలో పడిపోయింది. ఆ సమయంలోనే హుద్ హుద్ తుపాను బాధితుల కోసం నిర్వహించిన ‘మేముసైతం’ కార్యక్రమంలో భాగంగా క్రికెట్ మ్యాచ్ లో పాల్గొన్నాడు నాని. ఆ మ్యాచ్ లో 2 బంతులే ఆడి 0 పరుగులే చేశాడు నాని. తన ఆటకు, సినిమా కెరీర్ కు ముడిపెడుతూ అప్పట్లో ఓ ట్వీట్ పెట్టాడు నాని.

ఆ ట్వీట్లో.. ‘‘మేము సైతం మ్యాచ్ లో 2 బంతులాడా.. స్కోర్ 0. ఈ ఏడాది 2 సినిమాలు రిలీజయ్యాయి. స్కోర్ 0. ఈసారి బాగా ఆడతాను. చాలా బాగా.. ప్రామిస్’’ అని పేర్కొన్నాడు నాని. కట్ చేస్తే.. ఈ ఏడాది నాని భలే భలే మగాడివోయ్ లాంటి బ్లాక్ బస్టర్ తో పాటు ఎవడే సుబ్రమణ్యం లాంటి మంచి సినిమాతో ప్రేక్షకుల్ని పలకరించాడు. ఈ రెండు సినిమాలూ ‘ఐఐఎఫ్ ఏ ఉత్సవం’ అవార్డుల పోటీలో ఉన్న ఐదు సినిమాల్లో చోటు దక్కించుకోవడం విశేషం. ఓ అభిమాని నాని ఒకప్పుడు పెట్టిన ట్వీటుని గుర్తు చేస్తూ.. ఐఐఎఫ్ఏ ఉత్సవం కోసం షార్ట్ లిస్ట్ అయిన సినిమాల లిస్టు చూపిస్తూ ప్రామిస్ నిలబెట్టుకున్న నానికి కంగ్రాట్స్ చెప్పాడు. ఈ విషయాన్ని ట్విట్టర్ లో అందరితో పంచుకుని సంబరాలు చేసుకున్నాడు నాని.