ఎవరొచ్చినా రాకున్నా నితిన్ పక్కా

‘బాహుబలి: ది కంక్లూజన్’ తర్వాత టాలీవుడ్లో దాదాపు రెండు నెలల పాటు భారీ సినిమాల సందడి కనిపించలేదు. ఇప్పుడు ‘దువ్వాడ జగన్నాథం’తో మళ్లీ థియేటర్లు కళకళలాడుతున్నాయి. ఈ సినిమాకు డివైడ్ టాక్ ఉన్నప్పటికీ ఫస్ట్ వీకెండ్లో వసూళ్లకైతే ఢోకా లేదు. ఇక మళ్లీ బాక్సాఫీస్ ఈ స్థాయిలో కళకళలాడాలంటే కొంచెం సమయం పడుతుంది.

వచ్చే నెలలో వచ్చేవన్నీ మీడియం రేంజి సినిమాలే. మళ్లీ ఆగస్టులో కానీ.. కొంచెం పెద్ద స్థాయి సినిమాలు రావు. పంద్రాగస్టు వారాంతంలో మూడు నాలుగు సినిమాలు రిలీజవుతాయని అంటున్నారు. నితిన్ సినిమా ‘లై’తో పాటు సాయిధరమ్ మూవీ ‘జవాన్’.. బెల్లంకొండ శ్రీనివాస్-బోయపాటిల ‘జయ జానకి నాయక’.. అనుష్క ప్రధాన పాత్రలో తెరకెక్కుతున్న ‘భాగమతి’ ఇండిపెండెన్స్ డే వీకెండ్ మూవీ కన్నేశాయి.

ఐతే వీటిలో మిగతా సినిమాల మాటెలా ఉన్నా.. నితిన్ ‘లై’ మాత్రం ఆగస్టు 11న రావడం పక్కా అంటున్నాడు నిర్మాత అనిల్ సుంకర. ‘లై’ ఇదే తేదీకి పక్కాగా వస్తుందని అనిల్ ట్విట్టర్లో ప్రకటించాడు. అమెరికాలో లాంగ్ షెడ్యూల్ ముగిసిందని.. శుక్రవారమే చివరి షెడ్యూల్ మొదలైందని.. తమ బేనర్లో వచ్చిన ‘లెజెండ్’ సినిమాను చిత్రీకరించిన బిల్డింగ్ లోనే సెంటిమెంటుగా ‘లై’ చివరి షెడ్యూల్ షూటింగ్ జరుపుతున్నామని అప్ డేట్ ఇచ్చాడు అనిల్. మరి జవాన్.. జయ జానకి నాయక.. భాగమతి సినిమాల సంగతేమో కానీ.. ‘లై’ మాత్రం ఆగస్టు 11కు పక్కా అన్నమాట.

Like Us on Facebook : https://www.facebook.com/Tupakidotcom/