నితిన్ కోసం రిజిస్టర్ చేసిన టైటిల్ తో సత్యదేవ్ సినిమా...!

'జ్యోతిలక్ష్మి' 'బ్లఫ్ మాస్టర్' 'ఉమామహేశ్వర ఉగ్రరూపస్య' చిత్రాలతో మంచి గుర్తింపు తెచ్చుకున్న హీరో సత్యదేవ్ - మిల్కీ బ్యూటీ తమన్నా హీరోహీరోయిన్లుగా తెరకెక్కబోతోన్న చిత్రం ''గుర్తుందా శీతాకాలం''. కన్నడ హిట్ మూవీ ''లవ్ మాక్ టైల్'' చిత్రానికి రీమేక్‌ గా రానున్న ఈ చిత్రాన్ని ఈ నెల 27న పూజా కార్యక్రమాలతో ప్రారభించనున్నారు. ఇటీవల ఈ చిత్ర టైటిల్ లోగోతో పాటు హీరోయిన్ తమన్నా లుక్‌ ను కూడా చిత్ర యూనిట్ విడుదల చేసింది. నాగశేఖర్ మూవీస్ బ్యానర్‌ పై నాగశేఖర్ ఈ చిత్రాన్ని రూపొందిస్తున్నారు. సత్యా హెగ్డే సినిమాటోగ్రఫీ అందిస్తున్న ఈ చిత్రానికి యంగ్ మ్యూజిక్ డైరెక్టర్ కాలభైరవ సంగీతం అందిస్తున్నారు.

కాగా 'గుర్తుందా శీతాకాలం' టైటిల్ పై ఇప్పటికే పాజిటివ్ బజ్ క్రియేట్ అయింది. అయితే ఈ టైటిల్ నితిన్ సినిమా కోసం పెట్టాల్సిందని తెలుస్తోంది. కృష్ణ చైతన్య దర్శకత్వంలో నితిన్ - మేఘా ఆకాష్ కాంబోలో 'చల్ మోహన రంగా' అనే సినిమా వచ్చిన సంగతి తెలిసిందే. ఆ చిత్రానికి త్రివిక్రమ్ శ్రీనివాస్ స్టోరీని అందించడమే కాకుండా నిర్మాతగా కూడా వ్యవహరించారు. పవన్ కళ్యాణ్ ఈ చిత్రానికి కో ప్రొడ్యూసింగ్ చేసారు. అయితే ఈ సినిమాకి ముందుగా 'గుర్తుందా శీతాకాలం' అనే టైటిల్ ని రిజిస్టర్ చేయించారు. కానీ చివరి నిమిషంలో 'చల్ మోహన రంగా' అనే టైటిల్ ఖరారు చేశారు. ఇక త్రివిక్రమ్ శ్రీనివాస్ దగ్గర ఆ టైటిల్ అలానే ఉండిపోయింది. దీంతో దర్శకనిర్మాత నాగశేఖర్ 'గుర్తుందా శీతాకాలం' టైటిల్ కోసం త్రివిక్రమ్ సంప్రదించగానే ఆ టైటిల్ ఇచ్చేశారని తెలుస్తోంది. అప్పుడెప్పుడో నితిన్ కోసం రిజిస్టర్ చేయించిన టైటిల్ ఇప్పుడు సత్యదేవ్ కి ఉపయోగపడింది.