ఆ సూపర్ హిట్ వచ్చిన దశాబ్దంన్నరకు..

దశాబ్దంన్నర కిందట వచ్చిన ‘దిల్’ సినిమా అప్పట్లో ఎంత పెద్ద హిట్టయిందో తెలిసిందే. అగ్ర నిర్మాత రాజుకు పెద్ద విజయాన్నందించి.. ఆయన పేరు వెనుక ‘దిల్’ అనే పదం చేరడానికి కారణమైన సినిమా అది. ‘జయం’తో అప్పటికే హిట్టు కొట్టినప్పటికీ సోలో హీరోగా నితిన్ కు ప్రత్యేక గుర్తింపు తెచ్చిన చిత్రమిది.  సాధారణంగా ఒక హిట్టు కొట్టాక ఆ కాంబినేషన్లో మళ్లీ త్వరలోనే ఒక సినిమా మొదలైపోతుంటుంది. కానీ ‘దిల్’ సినిమాకు పని చేసిన వాళ్లు మాత్రం మళ్లీ కలిసి పని చేయలేదు. ఐతే ఇన్నేళ్ల తర్వాత ఆ చిత్ర నిర్మాత దిల్ రాజు.. హీరో నితిన్ కలిసి ఒక సినిమా చేస్తున్నారు. అదే.. శ్రీనివాస కళ్యాణం. ‘దిల్’లో విలన్ పాత్ర చేసిన ప్రకాష్ రాజ్ సైతం ఈ చిత్రంలో నటిస్తుండటం విశేషం. ఈ నేపథ్యంలో రాజు.. ప్రకాష్ రాజ్ లతో కలిసి ఉన్న ఫొటోను నితిన్ సోషల్ మీడియాలో షేర్ చేశాడు.

‘దిల్’ వచ్చిన ఇన్నేళ్లకు తాము ముగ్గురం మళ్లీ ఇలా కలిశామనని.. మళ్లీ ఇంకోసారి తాము పెద్ద హిట్టు కొట్టబోతున్నామని నితిన్ అన్నాడు. ‘దిల్’ తర్వాత ప్రకాష్ రాజ్ రాజు బేనర్లో చాలా సినిమాలే చేశాడు. ఐతే మధ్యలో రాజుకు ఆయనకు విభేదాలు నెలకొనడంతో కొంత కాలం ఈ సంస్థకు దూరమయ్యాడు. మళ్లీ అదే బేనర్లో‘శతమానం భవతి’ చేశాడు. ఈ సినిమా పెద్ద విజయాన్నందుకుంది. ఆ చిత్రాన్ని రూపొందించిన సతీశ్ వేగేశ్ననే ‘శ్రీనివాస కళ్యాణం’ తీస్తున్నాడు. ఇందులో నితిన్ సరసన రాశి ఖన్నా నటిస్తోంది. ‘శతమానం భవతి’ తరహాలోనే ఇది కూడా పక్కా ఫ్యామిలీ ఎంటర్టైనర్ గా తెరకెక్కుతున్నట్లు సమాచారం. ‘లై’.. ‘చల్ మోహన్ రంగ’ సినిమాలతో చేదు అనుభవాలు ఎదుర్కొన్న నితిన్ కు ఈ సినిమా హిట్టవడం చాలా అవసరం. చిత్రీకరణ చివరి దశలో ఉన్న ఈ చిత్రాన్ని ఆగస్టులో విడుదల చేయడానికి సన్నాహాలు చేస్తున్నారు.