అ.. లుక్స్ మీదే డిస్కషనంతా

నిన్న రాత్రి జరిగిన ‘అ’ ప్రి రిలీజ్ ఈవెంట్ చర్చనీయాంశంగా మారింది. ఈ వేడుకలో లాంచ్ చేసిన ‘అ’ థియేట్రికల్ ట్రైలర్ ఆసక్తి రేకెత్తించగా.. ఇందులో నాని.. రాజమౌళి లాంటి వాళ్లు మాట్లాడిన మాటలు కూడా అంతే చర్చనీయాంశమయ్యాయి. మరోవైపు ఈ వేడుకలో ఒక్కొక్కరి ‘లుక్స్’ గురించి కూడా చాలా చర్చ నడిచింది. ముందుగా నాని లుక్ గురించి ఈ వేడుక మొదలవడానికి ముందే చర్చ జరిగింది. వారం కిందట నాని ఒక యాక్సిడెంట్ చేసిన సంగతి తెలిసిందే. ఆ సందర్భంగా నాని ముఖం మీద గాయాలయ్యాయని.. ఒక పన్ను కూడా ఊడిందని ప్రచారం జరిగింది. నిన్నటి వేడుకలో అదంతా అబద్ధమే అని తేలింది. నాని మామూలుగానే కనిపించాడు. ముఖంపై ఏ గాయం లేదు.

మరోవైపు దర్శక ధీరుడు రాజమౌళి.. గతంతో పోలిస్తే సన్నబడి కొత్త లుక్‌ లో దర్శనమిచ్చాడు ఈ వేడుకలో. ఆయన మాట్లాడుతున్నపుడు సినిమాలో రెజీనా లుక్ గురించి ప్రత్యేకంగా ప్రస్తావించాడు. ఆమె ఫస్ట్ లుక్ చూసి తాను షాకయ్యానన్నాడు. ఇలాంటి లుక్ లోకి మారి వేరే సినిమాలు ఎలా చేస్తుందా అని ఆశ్చర్యపోయానన్నాడు. సినిమా మీద ఆమె చూపిస్తున్న ప్యాషన్ కు హ్యాట్సాఫ్ చెప్పాడు. ఇక ఈ వేడుకలో నిత్యా మీనన్ లుక్ కూడా పెద్ద చర్చకే దారి తీసింది. చాలా కాలం తర్వాత ఓ పబ్లిక్ ఈవెంట్ కు వచ్చిన నిత్య.. బాగా లావై.. షేడవుట్ అయిపోయి కనిపించి షాకిచ్చింది. అసలే నిత్య ఎత్తు తక్కువ. ఇక ఆమె ఇంతలా బరువు పెరిగితే ఎట్టా అని అందరూ చర్చించుకున్నారు. సినిమాలు వదిలేసిన కొన్నేళ్ల తర్వాత హీరోయిన్లు ఎలా అవుతారో అలా కనిపించింది నిత్య. ఈ లుక్ లో ఆమెను చూశాక తన కెరీర్ ఇక ముగిసినట్లే అన్న అభిప్రాయాలు వ్యక్తమయ్యాయి.