మెగా బ్రదర్స్ కి సర్దార్ షాకిచ్చాడా?

సర్దార్ గబ్బర్ సింగ్ రిజల్ట్ ఏంటో మూవీ రిలీజ్ రోజే తెలిసిపోయింది. ఫస్ట్ డే రికార్డ్స్ మినహాయించి.. సర్దార్ ద్వారా దక్కినదేమీ లేదు. మెగాభిమానానికి - పవన్ పవర్ కి తొలి రోజు వసూళ్లు నిదర్శనం అయినా.. దాన్ని నిలబెట్టేంతటి కంటెంట్ సర్దార్ లో లేదు. దీంతో ఫ్యాన్స్ నిరాశ చెందిన మాట వాస్తవం. ఈ డిజప్పాయింట్మెంట్ మెగా బ్రదర్స్ లోనూ కనిపిస్తోందంటున్నారు.

చేతులు కాలాక ఆకులు పట్టుకున్నట్లుగా.. ఫ్లాప్ టాక్ వచ్చేశాక ప్రమోషన్స్ మొదలుపెట్టాడు పవన్ కళ్యాణ్. అయితే, పవన్ లో ఉత్సాహం ఏ మాత్రం కనిపించలేదు. సాధారణంగానే కాసింత మూడీగా ఉండే పవన్ కళ్యాణ్ ఫేస్.. సర్దార్ రిజల్ట్ తో మరింత దిగాలు చెందాడు. నిజానికి ఈ మూవీకి అఫీషియల్ గా స్టోరీ- స్క్రీన్ ప్లే.. అనఫీషియల్ గా డైలాగ్స్ - డైరెక్షన్ - డ్యాన్స్ - ఫైట్స్.. ఇలా పవన్ అన్నీ తానై తీసేశాడు. అందుకే ఈ నిరుత్సాహం అని భావించచ్చు. మరోవైపు.. మెగాస్టార్ చిరంజీవిలో కూడా సర్దార్ గబ్బర్ సింగ్ ఇచ్చిన ఫలితం ప్రభావం కనిపిస్తోంది.

సాధారణంగా ఫ్యాన్స్ తో మాట్లాడేటపుడు చిరంజీవి మహా హుషారుగా ఉంటారు. కానీ సరైనోడు ఆడియో సక్సెస్ ఫంక్షన్ కోసం వైజాగ్ వచ్చిన చిరు కొంత నిరుత్సాహంగా కనిపించారు. ఇది సర్దార్ ఎఫెక్టే అని చెప్పచ్చు. అది కూడా బ్రూస్ లీ తర్వాత వచ్చిన షాక్ కావడంతో.. మరింత ప్రభావం కనిపిస్తోంది. ఈ ఎఫెక్ట్ నుంచి మెగా బ్రదర్స్ కోలుకోవడానికి కాస్త టైం పట్టచ్చంటున్నాయి ఇండస్ట్రీ వర్గాలు.