పవన్ పచ్చజెండా ఊపేశాడు

‘అత్తారింటికి దారేది’ విడుదలై రెండున్నరేళ్లవుతోంది. ఇప్పటిదాకా పవన్ హీరోగా ఇంకో సినిమా రాలేదు. ‘సర్దార్ గబ్బర్ సింగ్’ మీద అభిమానుల బోలెడు ఆశలతో ఉన్నారు కానీ.. ఆ సినిమా ఎప్పుడు పూర్తవుతుంది, ఎప్పుడు విడుదలవుతుంది అన్న విషయాల్లో క్లారిటీ లేదు. మరోవైపు పవన్ తర్వాతి సినిమాల విషయంలో చాలా గందరగోళమే నడుస్తోంది. ఓ నాలుగైదు ప్రాజెక్టుల గురించి ఊహాగానాలు వినిపించాయి కానీ.. ఏదీ పక్కా కాదు. నెల కిందటి వరకు దాసరి నిర్మాణంలో డాలీ దర్శకుడిగా చేయబోయే సినిమానే పవన్ తర్వాతి ప్రాజెక్టు అంటూ వచ్చారు. ఐతే కొన్ని రోజులుగా ఎస్.జె.సూర్య పేరు గట్టిగా వినిపిస్తోంది.

తాజా సమాచారం ప్రకారం సూర్య సినిమాకు పవన్ పచ్చజెండా ఊపేశాడట. ప్రస్తుతం పవన్ తో ‘సర్దార్ గబ్బర్ సింగ్’ తీస్తున్న శరత్ మరారే ఈ చిత్రాన్ని కూడా నిర్మించబోతున్నాడట. రేణు దేశాయ్ నిర్మాత అని ప్రచారం జరిగినప్పటికీ పవన్ మళ్లీ తన మిత్రుడైన శరత్ కే అవకాశం ఇచ్చినట్లు తెలుస్తోంది. పవన్-ఎస్.జె.సూర్య కాంబినేషన్లో వచ్చిన తొలి సినిమా ‘ఖుషి’ ఎంత పెద్ద సెన్సేషనో కొత్తగా చెప్పాల్సిన పని లేదు. ఐతే తర్వాత వీళ్లిద్దరూ కలిసి చేసిన ‘పులి’ పెద్ద డిజాస్టరయింది. అయినప్పటికీ సూర్యను నమ్మి ఇంకో ఛాన్స్ ఇస్తున్నాడు పవన్. ఇది ‘ఖుషి’కి సీక్వెల్ అన్న ఊహాగానాలు కూడా వినిపిస్తున్నాయి. అందులో వాస్తవమెంతో త్వరలో రాబోయే అధికారిక ప్రకటనతో తెలుస్తుంది.