అల అరవింద టాలీవుడ్‌ ను వదిలేయనుందా?

సౌత్‌ హీరోయిన్స్‌ అంతా కూడా బాలీవుడ్‌ లో రాణించాలని ప్రయత్నాలు చేసేవారే. ప్రతి ఒక్క సౌత్‌ హీరోయిన్‌ కు బాలీవుడ్‌ డ్రీమ్స్‌ ఉంటాయనడంలో ఎలాంటి సందేహం లేదు. సౌత్‌ లో టాప్‌ స్టార్‌ గా ఉన్న సమయంలో చాలా మంది బాలీవుడ్‌ బాట పట్టారు. అక్కడ ఎక్కువ పారితోషికం దక్కడంతో పాటు ఎక్కువ మందికి రీచ్‌ అవ్వొచ్చు అనే ఉద్దేశ్యంతో ఉత్తరాదికి వెళ్లాలని సౌత్‌ హీరోయిన్స్‌ ఆశ పడుతూ ఉంటారు. అక్కడ క్రేజ్‌ లేని వారు అక్కడ అంతగా ఆఫర్స్‌ రానివారు మాత్రం సౌత్‌ కు వస్తూ ఉంటారు.

ఇప్పుడు టాలీవుడ్‌ లో టాప్‌ స్టార్‌ గా ఉండి.. స్టార్‌ హీరోలకు మోస్ట్‌ వాంటెడ్‌ గా ఉన్న ముద్దుగుమ్మ పూజా హెగ్డే బాలీవుడ్‌ బాట పడుతుంది. ఈ అమ్మడు గతంలోనే మోహెంజదారో చిత్రంలో నటించింది. అయితే ఆ సినిమా ఫ్లాప్‌ అవ్వడంతో తెలుగులో ఈమె బిజీ అయ్యింది. మళ్లీ అక్కడ నుండి పూజాకు పిలుపు వచ్చింది. ఈసారి బాలీవుడ్‌ సూపర్‌ స్టార్‌ సల్మాన్‌ ఖాన్‌ తో నటించే అవకాశం రావడంతో ఈ అమ్మడి దుకాణం బాలీవుడ్‌ కు షిప్ట్‌ అవ్వడం ఖాయం అంటూ టాక్‌ వినిపిస్తుంది.

సల్మాన్‌ ఖాన్‌ హీరోగా తెరకెక్కుతున్న కబి ఈద్‌ కబి దివాళి చిత్రంలో ఈ అమ్మడికి ఛాన్స్‌ దక్కింది. గత ఏడాది హౌస్‌ ఫుల్‌ 4 చిత్రంలో ఈమె నలుగురిలో నారాయణ అన్నట్లుగా ఒక పాత్ర చేసింది. అదే ఇప్పుడు సల్మాన్‌ ఖాన్‌ చిత్రంలో ఆఫర్‌ ను తెచ్చి పెట్టినట్లుగా విశ్లేషకులు అభిప్రాయం వ్యక్తం చేస్తున్నారు. మెల్ల మెల్లగా బాలీవుడ్‌ లో బిజీ అవుతున్న ఈ అమ్మడు మెల్లగా టాలీవుడ్‌ కు కూడా దూరం అవుతుందేమో అని అభిమానులు టెన్షన్‌ పడుతున్నారు.