బాలీవుడ్ కి జంప్.. బుట్ట‌బొమ్మ చిక్కితే ఒట్టు!

బ్యాక్ టు బ్యాక్ సినిమాల‌తో క్ష‌ణం తీరిక లేనంత బిజీగా ఉంది పూజా హెగ్డే. ఓవైపు రాధేశ్యామ్ చిత్రీక‌ర‌ణ పూర్తి చేసి.. మోస్ట్ ఎలిజిబుల్ బ్యాచిల‌ర్ సెట్స్ లో బిజీ అయిన పూజా.. ఆ సినిమా చిత్రీక‌ర‌ణ ఇంకా బ్యాలెన్స్ మిగిలి ఉండగానే వ‌రుస‌గా బాలీవుడ్ చిత్రాల‌కు సంత‌కాలు చేసింది.

స‌ల్మాన్ భాయ్ స‌ర‌స‌న `క‌బీ ఈద్ క‌బీ క‌బీ దీపావ‌ళి` అనే భారీ చిత్రంలో న‌టించ‌నుంది. అలాగే ర‌ణవీర్ సింగ్ స‌ర‌స‌న‌ సిర్కస్ చిత్రీకరణలోనూ పాల్గొంటోంది. ఈ చిత్రానికి రోహిత్ శెట్టి ద‌ర్శ‌క‌త్వం వ‌హిస్తుండ‌గా టీసిరీస్-రిలయ‌న్స్ ఎంట‌ర్ టైన్ మెంట్స్ సంయుక్తంగా నిర్మిస్తున్నాయి.

ఈ సినిమాని కొన్ని వారాల క్రితం ప్రకటించారు. ఇందులో రణ్‌వీర్ సింగ్- జాక్వెలిన్ ఫెర్నాండెజ్- వరుణ్ శర్మ ప్రధాన పాత్రల్లో నటిస్తున్నారు. తాజాగా ఈ సినిమా రెగ్యుల‌ర్ చిత్రీక‌ర‌ణ ప్రారంభమైంది. పూజా హెగ్డే ఆన్ లొకేష‌న్ లో తన వానిటీ వ్యాన్ నుంచి కొన్ని ఫోటోల్ని షేర్ చేశారు. వ్యాన్ మీద అతికించిన కాగితంపై `రోహిత్ శెట్టి ప్రొడక్షన్జ్` అని రాసారు పూజా. ``ఇద్దరు శెట్టిలు కలిసినప్పుడు # షూట్ ‌టైమ్`` అంటూ వ్యాఖ్య‌ను జోడించింది. ఈ స్పీడ్ లోనే పూజా హెగ్డే ఇక‌పై బాలీవుడ్ లోనే బిజీ అయిపోతుందా? ఒక‌వేళ అలా జ‌రిగితే ఇక టాలీవుడ్ కి టాటా చెప్పేస్తుందా? అంటే దానికి కాల‌మే స‌మాధానం చెప్పాల్సి ఉంటుంది.

తాజా ప‌రిణామం చూస్తుంటే స‌ల్మాన్ -ర‌ణ‌వీర్ లాంటి స్టార్ హీరోల‌తో న‌టిస్తోంది కాబ‌ట్టి బంప‌ర్ హిట్లు కొట్టి అక్కడే కెరీర్ పరంగా లాక్ అయిపోతుందా? అన్న‌ది వేచి చూడాలి. మ‌రోవైపు కోలీవుడ్ లో ద‌ళ‌ప‌తి విజ‌య్ స‌ర‌స‌నా పూజా న‌టిస్తున్న సంగ‌తి తెలిసిందే.