'ఆ హీరో మూవీ వదలను' అంటూ పుకార్లపై స్పందించిన పూజ..

ప్రస్తుతం టాలీవుడ్, బాలీవుడ్ ఇండస్ట్రీలలో స్టార్ హీరోయిన్ పూజాహెగ్డే వరుస సినిమాలతో మోస్ట్ బిజీ హీరోయిన్ గా మారింది. ప్రస్తుతం పూజ చేతిలో అన్ని బిగ్ బడ్జెట్ సినిమాలే ఉండటం విశేషం. ముకుంద సినిమాతో కెరీర్ ప్రారంభించిన ఈ వయ్యారి.. అరవింద సమేత, మహర్షి, గద్దలకొండ గణేష్, అలవైకుంఠపురంలో లాంటి భారీ విజయాలను తన ఖాతాలో వేసుకుంది. ప్రస్తుతం పూజ చేతిలో డార్లింగ్ ప్రభాస్ సరసన నటిస్తున్న రాధేశ్యామ్ సినిమా ఉంది. ఈ సినిమాను రాధాకృష్ణ కుమార్ తెరకెక్కిస్తున్నాడు. అలాగే అక్కినేని అఖిల్ సరసన 'మోస్ట్ ఎలిజిబుల్ బ్యాచిలర్' సినిమాలో నటిస్తుంది. ఈ సినిమాను బొమ్మరిల్లు భాస్కర్ రూపొందిస్తున్నాడు. ఈ రెండు సినిమాలు కూడా విడుదలకు సిద్ధం అవుతున్నాయి. ప్రస్తుతం పూజ కెరీర్ నక్కతోక తొక్కినట్లే మారింది. అందుకే ఏ ఇండస్ట్రీ వైపు చూసినా ఆఫర్స్ ఇవ్వడానికి రెడీగా ఉన్నారట.

బాలీవుడ్ ఇండస్ట్రీలో రెండు బిగ్ బడ్జెట్ మూవీలలో నటిస్తోంది పూజ. కండలవీరుడు సల్మాన్ ఖాన్, రన్వీర్ సింగ్ లతో ఒక్కో సినిమా చేస్తోంది. ఇదిలా ఉండగా.. ఇటీవల అమ్మడు ఇళయదళపతి విజయ్ సరసన అవకాశం కొట్టేసినట్లు పుకార్లు వైరల్ అయ్యాయి. యువదర్శకుడు నెల్సన్ దిలీప్ కుమార్ దర్శకత్వం వహించనున్న దళపతి 65వ సినిమాలో పూజా దాదాపు ఖరారైనట్లు కథనాలు వెలువడ్డాయి. మాస్టర్ సినిమాతో రికార్డు కలెక్షన్స్ రాబట్టిన దళపతితో సినిమా అంటే పూజ పంట పండిందని అంతా భావించారు. కానీ అవేమి నిజం కాదని సడన్ షాకిచ్చింది పూజ. విజయ్ తో సినిమా అనే పుకార్ల పై పూజ స్పందించింది. అమ్మడు మాట్లాడుతూ.. 'నాకు కూడా విజయ్ గారితో నటించాలని ఉంది. కానీ ప్రస్తుతం స్ప్రెడ్ అవుతున్న రూమర్స్ నిజం కాదు. ఒకవేళ ఆయన సినిమాలో ఆఫర్ వస్తే మాత్రం అసలు వదులుకోను' అంటోంది ముంబై సుందరి. చూడాలి మరి అమ్మడి అదృష్టం ఎలా ఉందో!