బాహుబలి చిందేసే టైమొచ్చింది

బాహుబలి సినిమాతో టాలీవుడ్ నే కాకుండా టోటల్ ఇండియాలోనే అభిమానులను పెంచుకుని తెగ పాపులరైపోయాడు మన మిస్టర్ పర్ ఫెక్ట్ ప్రభాస్. తన లేటెస్ట్ మూవీ సాహోను కూడా ఓ రేంజీలో తెరకెక్కిస్తున్నారు. ప్రభాస్ కెరీర్లో బాహుబలి తరవాత భారీ బడ్జెట్ తో తీస్తున్నది సాహో సినిమాయే. ప్రభాస్ కు ప్రస్తుతం దేశమంతటా ఉన్న ఫాలోయింగ్ దృష్టిలో పెట్టుకుని తెలుగుతో పాటు తమిళం - హిందీ భాషల్లోనూ ఈ సినిమా ఒకేసారి షూట్ చేస్తున్నారు.

ఈమధ్య న్యూ ఇయర్ సెలబ్రేషన్స్ కోసం కాస్త షూటింగులకు గ్యాపిచ్చిన ప్రభాస్ ఇప్పుడు పూర్తి టైం సాహో కోసమే కేటాయించనున్నాడు. ముందు అనుకున్న ప్రకారమైతే సాహో టీం మొత్తం దుబాయ్ వెళ్లాల్సి ఉంది. అక్కడున్న అతి ఎత్తయిన భవనం బుర్జ్ ఖలీఫాపై భారీ యాక్షన్ ఎపిసోడ్స్ ప్లాన్ చేశారు. కానీ కొన్ని కారణాల వల్ల యూనిట్ ఇంకా దుబాయ్ వెళ్లలేదు. దాంతో ముందు సాంగ్స్ తీసే పని స్టార్ట్ చేశారు. ఈ సినిమాలో హీరోయిన్ గా నటిస్తున్న బాలీవుడ్ బ్యూటీ శ్రద్ధ కపూర్ కూడా ప్రభాస్ తో స్టెప్పులేసే పనిలో పడిపోయిందని తెలుస్తోంది. దీంతోపాటు మరికొన్ని ముఖ్యమైన సీన్లన్నీ తీసేసిన తరవాత దుబాయ్ షెడ్యూల్ ప్లాన్ చేయాలన్నది సాహో యూనిట్ ఆలోచన.

ఐదేళ్ల కాలం బాహుబలికే కేటాయించిన ప్రభాస్ మరో మూవీ గురించి ఆలోచించలేదు. దాంతో వెండితెరపై ప్రభాస్ డ్యాన్సులు చూసి చాలాకాలమై పోయింది. ఆ లోటును తీర్చేలా సాహోలా సాంగులను అదరహో అనిపించే రీతిలోనే డైరెక్టర్ సుజిత్ తీస్తున్నాడని యూనిట్ అంటోంది. ప్రభాస్ అభిమానులకు కూడా కావలసింది అదే కదా.