శ్రీదేవి సోడా సెంటర్ కోసం 'సలార్‌'

సుధీర్ బాబు హీరోగా ఆనంది హీరోయిన్‌ గా కరుణ కుమార్‌ దర్శకత్వంలో రూపొందిన శ్రీదేవి సోడా సెంటర్ విడుదలకు సిద్దం అయ్యింది. ఈ సినిమా చిత్రీకరణ ముగిసినప్పటి నుండి తెగ ప్రమోషన్ చేస్తూ ఉన్నారు. ఈ సినిమాను ఈనెల 27న విడుదల చేయబోతున్న నేపథ్యంలో ఇటీవలే ట్రైలర్ ను విడుదల చేశారు. మహేష్‌ బాబు చేతుల మీదుగా విడుదల అయిన ట్రైలర్‌ కు మంచి స్పందన వచ్చింది. శ్రీదేవి సోడా సెంటర్‌ కోసం సుధీర్‌ బాబు సాధ్యం అయినంత వరకు అన్ని ప్లాట్ ఫామ్స్ ద్వారా ప్రమోషన్‌ చేస్తున్నాడు.

తాజాగా ఈ సినిమా కోసం ప్రభాస్ ను కూడా రంగంలోకి దించాడు. ప్రభాస్‌ కు సుధీర్ బాబుకు సన్నిహిత సంబంధాలు ఉన్నాయి. రెగ్యులర్ గా తాను ప్రభాస్ ఇంటికి వెళ్తాను.. అక్కడ ప్రభాస్‌ పెట్టే భోజనం వారంలో ఒక్క సారి తిన్నా కూడా సిక్స్ ప్యాక్ లు.. బాడీ బిల్డింగ్ లు చేయడం సాధ్యం కాదు అంటూ ఇటీవల ఒక ఇంటర్వ్యూలో సరదాగా సుధీర్‌ బాబు కామెంట్స్ చేశాడు. ఇంతలో మరో వీడియో క్లిప్ ప్రస్తుతం యూట్యూబ్‌ లో సందడి చేస్తోంది.

ప్రభాస్ ప్రస్తుతం ముంబయిలో ఆదిపురుష్‌ సినిమా షూటింగ్ కోసం ఉన్న విషయం తెల్సిందే. చిత్ర యూనిట్‌ సభ్యులు అక్కడకు  వెళ్లి మరీ ప్రభాస్ తో శ్రీదేవి సోడా సెంటర్ గురించి మాట్లాడించడం జరిగింది. సినిమా గురించి ప్రభాస్ మాట్లాడుతూ సెకండ్‌ వేవ్‌ తర్వాత ఇది పెద్ద రిలీజ్. ట్రైలర్‌ చూశా చాలా బాగా వచ్చింది. సినిమా ఖచ్చితంగా బాగుంటుంది అంటూ వ్యాఖ్యలు చేశాడు. ఈ ఫుల్ ఇంటర్వ్యూ అతి త్వరలోనే రాబోతుంది. ఈ ఇంటర్వ్యూలో సినిమా గురించి ప్రభాస్‌ మరెన్ని ముచ్చట్లు చెప్పాడో చూడాలి.