ప్రభాస్ రిస్క్ చేస్తాడట

టాలీవుడ్ యంగ్ రెబల్ స్టార్ ప్రబాస్ సినిమాలో ఎలా కనిపించినా అది స్పెషల్ అని చెప్పాలి. ప్రభాస్ ని ఒక మాస్ లుక్ అండ్ స్టయిలిష్ లుక్ లో చూసి చాలా కాలమే అవుతోంది. బాహుబలి కోసం తన ఐదేళ్ల జీవితాన్ని పెట్టేసిన ప్రభాస్ మళ్లీ తన గత వైభవాన్ని స్టయిలిష్ గా చూపించాలని ట్రై చేస్తున్నాడు.

బాహుబలి ఇచ్చిన విజయంతో దేశ ప్రజలకు బాగా దగ్గరైన ప్రభాస్ అన్ని బాషల ప్రేక్షకులకు నచ్చేలా సాహో సినిమా కోసం కష్టపడుతున్నాడు. హిందీ తెలుగులో సుజిత్ ఈ సినిమాను తెరకెక్కిస్తోన్న సంగతి తెలిసిందే. ఇక ప్రభాస్ ఈ సినిమాలో కీలకమైన యాక్షన్ సీన్స్ ని డూప్ లేకుండా చెయ్యాలని డిసైడ్ అయ్యాడట. ముందుగా చిత్ర యూనిట్ యాక్షన్ సీన్స్ కోసం డూప్ ని కూడా సెట్ చేసుకుందట. కానీ ప్రభాస్ కి యాక్షన్ సీన్స్ నచ్చడంతో అంత మంచి సీన్స్ ని వదులు కోవడం ఇష్టం లేక ఇష్టంగా చేస్తానని చెప్పాడట. కానీ దర్శకుడు సుజిత్ మాత్రం ప్రభాస్ తో చేయించడం అంత మంచిది కాదు అనే ఆలోచనతో ఉన్నట్లు తెలుస్తోంది.

బాహుబలి యుద్ధ సన్నివేశాల్లో కూడా ఒకసారి గాయపడ్డా ప్రభాస్ కొలుకోవడానికి చాలా కాలమే పట్టింది. కానీ ప్రభాస్ మాత్రం మళ్లీ అదే తరహాలో సొంతంగా యాక్షన్ సీన్స్ చేస్తానని చెప్పడం చిత్ర యూనిట్ లో కొంచెం కంగారును కలిగిస్తోందని టాక్. మరి ప్రభాస్ ఎలా మ్యానేజ్ చేస్తాడో చూడాలి. హీరోయిన్ గా శ్రద్దా కపూర్ నటిస్తోన్న ఈ సినిమాను యూవీ క్రియేషన్స్ నిర్మిస్తోంది.