ఇది బాలయ్య పాటేనా..

టాలీవుడ్లో తిరుగులేని మాస్ హీరోల్లో నందమూరి బాలకృష్ణ ఒకరు. ఆయన సినిమాలన్నీ మాస్ ను లక్ష్యంగా చేసుకునే ఉంటాయి. బాలయ్య సినిమాలో పాటలు కూడా ఊర మాస్ గా ఉండేలా తీర్చిదిద్దుతుంటారు. ఆయన సినిమాల్లో మెలోడీలు అరుదు. ఒక వేళ మెలోడీలున్నప్పటికీ వాటిలోనూ మాస్ టచ్ ఉంటుంది. పూర్తి క్లాస్ గా సాగే మెలోడీలు బాలయ్య సినిమాల్లో అరుదే. బాలయ్య కొత్త సినిమా ‘జై సింహా’ టీజర్.. ట్రైలర్ చూస్తే ఇది ఊర మాస్ సినిమాలాగే అనిపించింది. ఈ సినిమా టోన్ చూస్తే ఇందులో మెలోడీలకు అవకాశమున్నట్లే కనిపించలేదు. ఐతే ఈ చిత్ర సంగీత దర్శకుడు చిరంతన్ భట్ మాత్రం బాలయ్య శైలికి విరుద్ధమైన పాట ఒకటి ట్యూన్ చేశాడు.

ప్రియం జగమే ఆనందమయం అంటూ సాగే ఈ పాట ప్రోమో ఒకటి రిలీజ్ చేశారు. ఈ పాట వింటే ఇదేదో క్లాస్ లవ్ స్టోరీలో ఉన్న పాటేమో అనిపిస్తుంది. చాలా శ్రావ్యంగా.. పక్కా క్లాస్ గా ఉన్న ఈ పాటలో విజువల్స్ కూడా క్లాస్ గా ఉన్నాయి. బాలయ్య ఇందులో వెరైటీ స్టెప్పులేశాడు. అవి నందమూరి అభిమానులకు కొత్తగా అనిపిస్తున్నాయి. మొత్తంగా ఈ పాట ఇప్పుడు సోషల్ మీడియాలో చర్చనీయాంశమవుతోంది. బాలయ్య సినిమాలో ఇలాంటి పాటేంటి అంటున్నారు జనాలు ఇక ‘జై సింహా’ ఆడియో ఓవరాల్ గా పర్వాలేదనిపించుకుంది. చిరంతన్ భట్ ఇంతకుముందు బాలయ్య నటించిన ‘గౌతమీపుత్ర శాతకర్ణి’కి సంగీతాన్నందించిన సంగతి తెలిసిందే. ఆ సినిమాకు చిరంతన్ ఓకే కానీ.. ‘జై సింహా’ లాంటి మాస్ మసాలా సినిమాకు అతనెంత వరకు కరెక్ట్ అని సందేహించారు చాలామంది. పాటల వరకు ఓకే అనిపించిన చిరంతన్.. బ్యాగ్రౌండ్ స్కోర్ విషయంలో ఎలాంటి ఔట్ పుట్ ఇచ్చాడో చూడాలి. ఈ చిత్రం జనవరి 12న ప్రేక్షకుల ముందుకు రానున్న సంగతి తెలిసిందే.

Full View