అవునా.. పూరి ఆ సినిమా చేస్తున్నాడా?

పూరి జగన్నాథ్‌ టాలెంట్‌ టాలీవుడ్‌కు పరిమితం కాదు. బాలీవుడ్‌కు వెళ్లి అమితాబ్‌ బచ్చన్‌ లాంటి సూపర్‌ స్టార్‌తో  'బుడ్డా హోగా తేరా బాప్‌' అనే సినిమా తీసి హిట్టు కొట్టి వచ్చాడు పూరి. ఇక కన్నడ నాట కూడా పూరికి మంచి క్రేజే ఉంది. లెజండరీ యాక్టర్‌ రాజ్‌ కుమార్‌ తనయుడు పునీత్‌ రాజ్‌కుమార్‌ ఇప్పుడు శాండిల్‌వుడ్‌లో సూపర్‌ స్టార్‌ రేంజి అందుకున్నాడంటే అందుకు కారణం మన పూరినే. 'ఇడియట్‌' సినిమాను తెలుగులో తీయడానికి ముందే పునీత్‌ హీరోగా 'అప్పు' పేరుతో కన్నడలో తీశాడు పూరి. ఆ సినిమా సూపర్‌ హిట్టయి పునీత్‌కు స్టార్‌ స్టేటస్‌ సంపాదించి పెట్టింది.

'అప్పు' తర్వాత పూరి మళ్లీ కన్నడ వైపు చూడలేదు. ఐతే పూరిని శాండిల్‌వుడ్‌లోకి రప్పించేందుకు ప్రయత్నాలు జరుగుతున్నాయని.. అతడి ముందుకో భారీ ఆఫర్‌ వచ్చిందని సమాచారం. కర్నాటక మాజీ ముఖ్యమంత్రి కుమారస్వామి తన కుమారుడు నిఖిల్‌ను హీరోగా అరంగేట్రం చేయిద్దామనుకుంటున్నారు. రూ.60 కోట్ల భారీ బడ్జెట్‌తో ఈ సినిమా తీయడానికి ప్లాన్‌ చేస్తున్నారు. గతంలో పునీత్‌ను పూరి ఎలా లాంచ్‌ చేశాడో తెలుసు కాబట్టి.. అతడి చేతుల మీదుగానే తన కొడుకును కూడా హీరోగా చేయాలని భావిస్తున్నాడట కుమారస్వామి. నిఖిల్‌తో సినిమా తీయాలని.. రూ.60 కోట్ల భారీ బడ్జెట్‌తో పాటు భారీ పారితోషకం కూడా ఇస్తానని పూరికి ఆఫర్‌ చేశాడట మాజీ ముఖ్యమంత్రి. మంచి ఆఫర్‌ రావడంతో పూరి ఈ సినిమాను ఒప్పుకునే అవకాశం ఉందంటున్నారు. కుమారస్వామి రాజకీయాల్లోకి రాకముందు నిర్మాతగా, ఎగ్జిబిటర్‌గా, డిస్ట్రిబ్యూటర్‌గా ఉన్నారు. కొడుకును హీరో చేయాలని కలలు కంటున్న కుమారస్వామి.. నిఖిల్‌కు విదేశాల్లో శిక్షణ ఇప్పిస్తున్నాడు.