షాకింగ్: వంశీ పైడిపల్లిపై పీవీపీ ఫిర్యాదు

భారీ సినిమాలకు కేరాఫ్ అడ్రస్ అయిన పీవీపీ బేనర్ కు సక్సెస్ రేట్ తక్కువ. ఆ సంస్థ నుంచి వచ్చిన కొన్ని విజయాల్లో ‘ఊపిరి’ ఒకటి. ఆ బేనర్లో అత్యధిక వసూళ్లు సాధించిన సినిమా కూడా ఇదే. ఆ సంస్థకు అలాంటి విజయాన్నందించిన దర్శకుడు వంశీ పైడిపల్లి ఇప్పుడు పీవీపీకి శత్రువైపోయాడు. తనకు ఇచ్చిన కమిట్మెంట్ ను తుంగలో తొక్కినందుకు వంశీ మీద నిర్మాతల మండలిలో ఫిర్యాదు చేశాడు పీపీవీ. ఇంతకీ మేటర్ ఏంటంటే..

‘ఊపిరి’ తర్వాత తన తర్వాతి సినిమాను కూడా పీవీపీ బేనర్లోనే చేయడానికి కమిట్మెంట్ ఇచ్చాడు వంశీ పైడిపల్లి. ఈ మేరకు అగ్రిమెంట్ కూడా కుదిరింది. వంశీ దర్శకత్వంలో మహేష్ హీరోగా పీవీపీ ఓ సినిమా కూడా అనౌన్స్ చేశాడు. ఈ సినిమాకు సంబంధించిన స్క్రిప్టు వర్కంతా కూడా పీవీపీ కార్యాయలంలోనే జరిగింది. ఆయనే రచయితల్ని కూడా సమకూర్చాడు. కానీ ఎక్కడ తేడా కొట్టిందో కానీ.. ఈ చిత్రాన్ని పీవీపీ బేనర్లో చేయడానికి వంశీ ఒప్పుకోలేదు. మధ్యలో దిల్ రాజు.. అశ్వనీదత్ సీన్లోకి ఎంటరయ్యారు. వాళ్ల నిర్మాణంలోనే మహేష్ సినిమా ఉంటుందని ఇటీవలే వంశీ ప్రకటించాడు.

మరోవైపు పీవీపీ వాళ్లకు ‘బ్రహ్మోత్సవం’ తర్వాత ఇంకో సినిమా చేసేందుకు కమిట్మెంట్ ఇచ్చిన మహేష్.. వంశీ సినిమా కోసం తీసుకున్న అడ్వాన్స్ తిరిగిచ్చేసి.. వేరే సినిమా చేస్తానని మాటిచ్చాడు. కానీ వంశీతో వ్యవహారమే సెటిలవ్వలేదు. ఈ నేపథ్యంలోనే పీవీపీ అతడి మీద నిర్మాతల మండలిలో ఫిర్యాదు చేశాడు. ఈ నేపథ్యంలో మహేష్ బాబు జోక్యం చేసుకుని సమస్యను పరిష్కరిస్తే తప్ప వంశీ సినిమా ముందుకు కదిలేలా లేదు.

Like Us on Facebook : https://www.facebook.com/Tupakidotcom/