రాజ రాజ చోర' టీజర్ అప్డేట్: గంగవ్వ చెప్పిన శ్రీ విష్ణు 'చోర గాధ'

టాలీవుడ్ హీరో శ్రీ విష్ణు.. విభిన్నమైన కథలను ఎంపిక చేసుకుంటూ.. విలక్షణమైన పాత్రలతో తనకంటూ ప్రత్యేకమైన గుర్తింపు తెచ్చుకున్నాడు. ఈ క్రమంలో ''రాజ రాజ చోర‌'' అనే ఆసక్తికరమైన సినిమాతో వస్తున్నాడు శ్రీవిష్ణు. మేఘా ఆకాశ్ - సున‌య‌న హీరోయిన్లుగా న‌టిస్తున్న‌ ఈ ఎంటర్టైనర్ ని హ‌సిత్ గోలి తెరకెక్కిస్తున్నాడు. టైటిల్ తోనే ఇంట్రెస్ట్ క్రియేట్ చేసిన మేకర్స్.. ప్రచార చిత్రాల్లో చోర (దొంగ) అనే కొత్త అవతారంలో శ్రీవిష్ణు ను చూపించి అంచనాలు కలిగించారు. అయితే ప్ర‌స్తుతం పోస్ట్ ప్రొడ‌క్ష‌న్ వ‌ర్క్ జ‌రుపుకుంటున్న ఈ చిత్రానికి సంబంధించిన కొంత‌కాలంగా ఎలాంటి అప్డేట్స్ లేవు. ఈ నేపథ్యంలో సరికొత్త ప్రమోషనల్ స్ట్రాటజీతో 'రాజ రాజ చోర‌' టీజర్ అప్డేట్ ఇచ్చారు.

బిగ్ బాస్ ఫేమ్ గంగవ్వ వాయిస్ ఓవర్ తో 'చోర గాధ' అంటూ ఓ చిన్న 2డీ యానిమేషన్ వీడియోను రిలీజ్ చేశారు. నీకు ఊ కొట్టే కథ చెబుతా.. నేను ఏది చెప్పినా తిరిగి ప్రశ్నలు అడగకుండా ఊకొట్టాలి అంటూ ఓ చిన్న పిల్లాడికి గంగవ్వ ఆకర్షణీయమైన కథను వివరిస్తోంది. ''అనగనగా.. భూమి నుంచి కోతి వచ్చింది.. బంగారం వచ్చింది. కోతి మనిషి అయ్యింది.. బంగారం కిరీటం అయ్యింది. మనిషి దొంగ అయ్యిండు.. కిరీటం రాజు అయింది..'' అంటూ ఆహ్లాదకరమైన 'రాజు - దొంగ' కథ చెప్పింది గంగవ్వ. అయితే రాజు కిరీటాన్ని దొంగ ఎత్తుకెళ్లిన తర్వాత ఏమి జరిగింది.. రాజు ఏమి చేసాడు.. దొంగ దొరికాడా లేదా అంటూ చెప్పిన గంగవ్వ.. 'రాజ రాజ చోర‌' టీజర్ జూన్ 18న రాబోతున్నట్లు తెలిసేలా చేసింది. అసలు రాజు - దొంగ కథ ఏంటి? కిరీటం సంగతి ఏంటి అనేది టీజర్ లో చెప్పనున్నారు.

కాగా, 'రాజ రాజ చోర‌' చిత్రాన్ని పీపుల్స్ మీడియా ఫ్యాక్ట‌రీ మరియు అభిషేక్ అగ‌ర్వాల్ ఆర్ట్స్ ప‌తాకాలపై టి.జి.విశ్వప్రసాద్ - అభిషేక్ అగర్వాల్ నిర్మిస్తున్నారు. దీనికి వివేక్ కూచిభొట్ల స‌హ నిర్మాతగా.. కీర్తి చౌద‌రి క్రియేటివ్ ప్రొడ్యూస‌ర్ గా వ్య‌వ‌హ‌రిస్తున్నారు. ఇందులో తనికెళ్ళ భరణి - రవిబాబు - కాదంబరి కిరణ్ - శ్రీకాంత్ అయ్యంగార్ - అజయ్ ఘోష్ - వాసు ఇంటూరి తదితరులు ఇతర పాత్రలు పోషిస్తున్నారు. వివేక్ సాగ‌ర్ ఈ చిత్రానికి సంగీతం సమకూరుస్తున్నారు. వేదరామన్ సినిమాటోగ్రఫీ అందిస్తుండగా.. విప్లవ్ నిషాదం ఎడిటింగ్ వర్క్ చేస్తున్నారు.