రజినీ చెప్పాడు.. కబాలి వస్తోందంతే

సూపర్ స్టార్ రజినీకాంత్ సినిమాకు సంబంధించి ఏ చిన్న వార్త అయినా సౌత్ ఇండియన్ ఆడియన్స్ కి విపరీతమైన ఆసక్తి ఉంటుంది. అందుకే ఆయన సినిమాల గురించి రకరకాల ఊహాగానాలు సృష్టించేస్తుంటారు జనాలు. రజినీ కొత్త సినిమా ‘కబాలి’ విషయంలోనూ మూణ్నాలుగు రోజులుగా కొన్ని ఊహాగానాలు వినిపించాయి. ఈ సినిమా రిలీజ్ డేట్ వాయిదా పడిపోయిందని.. అనుకున్న సమయానికి సినిమా విడుదల కాదని వార్తలు హల్ చల్ చేశాయి. దీంతో సూపర్ స్టార్ అభిమానులు తీవ్ర నిరాశకు గురయ్యారు. ఐతే అభిమానుల ఆవేదన చూసి రజినీ వెంటనే స్పందించారు.

నిన్న ‘పద్మవిభూషణ్’ అవార్డు అందుకున్న సందర్భంగా రజినీ తన కొత్త సినిమా కబుర్ల గురించి మాట్లాడాడు. ఈ సినిమా అనుకున్నట్లే మే చివరి వారంలో రిలీజవుతుందని చెప్పాడు. ఆ తేదీ విషయంలో ఏదైనా ఇబ్బంది ఉంటే జూన్ మొదటి వారంలో పక్కాగా సినిమా విడుదలవుతుందన్నాడు. దీంతో అభిమానులు హమ్మయ్య అనుకున్నారు. ఇక ‘కబాలి’ ఫస్ట్ టీజర్ ను అతి త్వరలోనే రిలీజ్ చేయడానికి సన్నాహాలు జరుగుతున్నాయి. ఈలోపు రజినీ కొత్త లుక్స్ కొన్ని రిలీజ్ చేస్తారట. రజినీ ముసలివాడిగా.. యంగ్ గా ఉన్న అవతారాల్ని మిక్స్ చేసి రిలీజ్ చేయబోతున్న ఓ కొత్త పోస్టర్ సెన్సేషన్ అవుతుందని యూనిట్ సభ్యులు చెబుతున్నారు. పా.రంజిత్ దర్శకత్వం వహించిన ఈ చిత్రంలో రజినీ సరసన రాధికా ఆప్టే నటిస్తున్న సంగతి తెలిసిందే.