'ఆచార్య' లో చరణ్ పాత్రపై కీలక సమాచారం..!

మెగా పవర్ స్టార్ రామ్ చరణ్ నటించిన 'మగధీర' 'బ్రూస్ లీ' చిత్రాలలో మెగాస్టార్ చిరంజీవి గెస్ట్ అప్పీరియన్స్ ఇచ్చిన సంగతి తెలిసిందే. ఇప్పుడు మరోసారి చిరు - చిరుత స్క్రీన్ షేర్ చేసుకోడానికి రెడీ అవుతున్నారు. కొరటాల శివ దర్శకత్వంలో చిరంజీవి హీరోగా నటిస్తున్న లేటెస్ట్ మూవీ 'ఆచార్య' లో చరణ్ కీలక పాత్రలో నటించనున్నాడు. సందేశాత్మక అంశాలతో కమర్షియల్ ఎంటర్టైనర్ గా రూపొందుతున్న ఈ చిత్రంలో ఓ అతిథి పాత్రను క్రియేట్ చేసాడు కొరటాల. ఈ క్యారెక్టర్ చరణ్ తో చేయించాలని చిరు నిర్ణయించుకున్నారు. దీంతో చిరంజీవి - చరణ్ ఒకే స్క్రీన్ పై చూడబోతున్నందుకు మెగా ఫ్యాన్స్ ఖుషీలో ఉన్నారు. అయితే ముందుగా కేవలం 5 నిమిషాల అతిథి పాత్రని క్రియేట్ చేసిన కొరటాల శివ.. ఇప్పుడు చరణ్ కోసం పాత్ర నిడివి పెంచుతున్నాడట. ఈ పాత్ర సుమారు 25 - 30 నిమిషాలు ఉండేలా ప్లాన్ చేస్తున్నారని టాక్ నడుస్తోంది.

చరణ్ ని దృష్టిలో పెట్టుకొని ఇప్పటికే సీన్స్ మార్చి రాసిన కొరటాల.. జనవరి నుంచి చెర్రీ తో షూట్ చేయాలని ప్లాన్ చేస్తున్నాడట. కరోనా కారణంగా నిలిచిపోయిన 'ఆచార్య' షూటింగ్ ఇటీవలే తిరిగి స్టార్ట్ అయిన విషయం తెలిసిందే. హైదరాబాద్ సమీపంలోని కోకాపేట లో ప్రత్యేకంగా వేసిన సెట్ లో చిత్రీకరణ జరుపుతున్నారు. చిరంజీవి - సోనూసూద్ మధ్య కొన్ని కీలక సన్నివేశాలను షూట్ చేస్తున్నారని తెలుస్తోంది. త్వరలో హీరోయిన్ కాజల్ కిచ్లు కూడా షూటింగ్ లో జాయిన్ కానుంది. ప్రస్తుతం నిహారిక పెళ్లి కోసం రాజస్థాన్ లోని ఉదయ్ పూర్ లో ఉన్న చిరంజీవి.. హైదరాబాద్ వచ్చాక తిరిగి సెట్స్ లో అడుగుపెట్టనున్నారు. కొణిదెల ప్రొడక్షన్స్ సమర్పణలో మాట్నీ మూవీస్ బ్యానర్ పై నిరంజన్ రెడ్డి - రామ్ చరణ్ ఈ చిత్రాన్ని సంయుక్తంగా నిర్మిస్తున్నారు. ఈ చిత్రానికి మణిశర్మ సంగీతం అందిస్తుండగా.. తిరు సినిమాటోగ్రాఫర్ గా వ్యవహరిస్తున్నారు. 'ఆచార్య' ను 2021 సమ్మర్ లో రిలీజ్ చేయనున్నారు.