రవితేజ రిస్క్ కి రెడీ!!

ఇప్పటిదాకా తన అభిమానులను మాస్ ప్రేక్షకులను టార్గెట్ చేస్తూ అలాంటి కథలతోనే అటు హిట్లు ఫ్లాపులు సమానంగా అందుకుంటున్న మాస్ రాజా రవితేజ పంథా మార్చి ప్రయోగాలకు సిద్ధమవుతున్నాడు. శీను వైట్ల దర్శకత్వంలో చేసిన అమర్ అక్బర్ ఆంటోనీ షూటింగ్ చివరి దశలో ఉండటంతో నెక్స్ట్ ఏ మూవీ ఉంటుందా అనే ఆసక్తి ఇప్పటికే నెలకొంది. ఎప్పటిలాగా కాకుండా రవితేజ మొదటిసారి సైంటిఫిక్ థ్రిల్లర్ లో నటించబోతున్నాడు. ఎక్కడికి పోతావు చిన్నవాడా-ఒక్క క్షణం ఫేమ్ విఐ ఆనంద్ దర్శకుడు. ఇందులో ముగ్గురు హీరోయిన్లు ఉండటం మరో విశేషం. ఇప్పటికే నభా నటేష్ కన్ఫర్మ్ కాగా మిగిలిన వాళ్ళ ఎంపిక జరగాల్సి ఉంది. నన్ను దోచుకుందువటేలో నటనతో ఆకట్టుకున్న నభా నటేష్ కు మరో మంచి రోల్ దక్కినట్టు తెలిసింది. కెరీర్ లో ఇప్పటివరకు ఈ జానర్ ను రవితేజ టచ్ చేయలేదు. ఇదే మొదటిసారి. తమన్ సంగీతం అందిస్తున్నాడు. కార్తీక్ ఘట్టమనేని ఛాయాగ్రహణం మరో ప్రత్యేక ఆకర్షణగా నిలవనుంది. నేల టికెట్టు నిర్మాత రామ్ తాళ్ళూరి రవితేజతో చేస్తున్న రెండో మూవీ ఇది

మొత్తనికి రవితేజ రూట్ మార్చడం మంచి పరిణామం. థ్రిల్లర్స్ ని డీల్ చేయడంలో తన ప్రత్యేకతను రుజువు చేసుకున్న విఐ ఆనంద్ రవితేజ సినిమా స్క్రిప్ట్ విషయంలో ప్రత్యేక శ్రద్ధ తీసుకున్నట్టు సమాచారం. ఇలాంటి బ్యాక్ డ్రాప్ లో రవితేజ సినిమా చేయలేదు కాబట్టి అభిమానులకు సైతం ఇది ఉత్సాహాన్ని ఇచ్చేదే. ప్రీ ప్రొడక్షన్ పనుల్లో ఉన్న ఈ మూవీ షూటింగ్ త్వరలోనే ప్రారంభం కానుంది. మిగిలిన ఇద్దరు హీరోయిన్లను అతి త్వరలో ఫైనల్ చేయబోతున్నారు. రవితేజ ఫ్యాన్స్ ఎదురుచూస్తున్న అమర్ అక్బర్ ఆంటోనీ విడుదల తేది ఇంకా ఖరారు కావాల్సి ఉంది. విఐ ఆనంద్ సినిమా వచ్చే వేసవిలో విడుదల చేసేలా ప్లానింగ్ జరుగుతున్నట్టు సమాచారం. ఈ మధ్యకాలంలో సైంటిఫిక్ థ్రిల్లర్స్ పెద్దగా రావడం లేదు. రవితేజ లాంటి స్టేచర్ ఉన్న హీరో అంటే మార్కెట్ పరంగా బాగా ప్లస్ అవుతుంది. విఐ ఆనంద్ టేకింగ్ మేజిక్ తో తమ హీరో కి పెద్ద హిట్ ఇస్తాడనే నమ్మకంతో ఉన్నారు అభిమానులు.