ర‌వితేజ‌తో గొడ‌వ‌న్నారు.. క్లాప్ కొట్టాడే

నిప్పు లేనిదే పొగ‌రాదంటారు. కానీ శూన్యం లోంచి నిప్పును పుట్టించేసి పెద్ద మంట‌లే మండిపోతున్న‌ట్లు భ్ర‌మింప‌జేసే జ‌నాలు చాలామంది ఉంటారు సినిమా ఇండ‌స్ట్రీలో. అప్ప‌ట్లో ‘కిక్‌-2’ సినిమాకు సంబంధించి ఎన్నెన్ని రూమ‌ర్లు వినిపించాయో తెలిసిందే. ఈ సినిమా ఔట్ పుట్ విష‌యంలో క‌ళ్యాణ్ రామ్.. ర‌వితేజ‌ల మ‌ధ్య విభేదాలు త‌లెత్తాయ‌ని.. సినిమా ఫ్లాప్ కావ‌డంతో ఇద్ద‌రి మ‌ధ్య దూరం మ‌రింత పెరిగింద‌ని.. అందుకే నాటి నుంచి వాళ్లిద్ద‌రూ ఎక్క‌డా క‌లుసుకోలేద‌ని చెప్పుకున్నారు ఇండ‌స్ట్రీలో. ఐతే ఈ రూమ‌ర్ల‌కు సోమ‌వారం తెర‌ప‌డింది.

ర‌వితేజ కొత్త సినిమా ‘రాజా ది గ్రేట్’ ప్రారంభోత్స‌వానికి క‌ళ్యాణ్ రామ్ ముఖ్య అతిథిగా హాజ‌ర‌య్యాడు. అత‌నే క్లాప్ కొట్టాడు. క‌ళ్యాణ్‌-ర‌వితేజ ఈ వేడుక‌లో చాలా స‌న్నిహితంగా మెలిగారు. మ‌రోవైపు ఈ క్లాప్ తో మ‌రో రూమ‌ర్ కు కూడా ఫుల్ స్టాప్ పెట్టాడు క‌ళ్యాణ్ రామ్‌. ఈ చిత్రానికి ద‌ర్శ‌కుడైన అనిల్ రావిపూడితోనూ క‌ళ్యాణ్ రామ్ కు పొస‌గ‌ట్లేద‌ని అన్నారు. అనిల్ తో సినిమా చేయాల‌ని ఎన్టీఆర్ ఆశ‌ప‌డితే.. అత‌డితో వ‌ద్ద‌ని బాబీని క‌ళ్యాణ్ తెర‌మీదికి తెచ్చాడ‌ని వార్త‌లొచ్చాయి. ఈ నేప‌థ్యంలో అనిల్ తో క‌ళ్యాణ్ ఈక్వేష‌న్ కూడా తేడా వ‌చ్చిన‌ట్లు గుస‌గుస‌లు వినిపించాయి. కానీ ‘రాజా ది గ్రేట్’ సినిమాకు క్లాప్ కొట్ట‌డం ద్వారా ఈ రూమ‌ర్ పుట్టించిన వాళ్ల‌కు కూడా పంచ్ ఇచ్చాడు క‌ళ్యాణ్ రామ్. మొత్తానికి ఒక్క క్లాప్ తో రెండు పంచులు ఇచ్చాడ‌న్న‌మాట నంద‌మూరి హీరో.