ప్రభాస్ కి పోటీగా బాక్సాఫీస్ బరిలో దిగుతున్న 'ఆర్.ఆర్.ఆర్' బ్యూటీ..!

యంగ్ రెబల్ స్టార్ ప్రభాస్ నటిస్తున్న వింటేజ్‌ లవ్ స్టోరీ ''రాధే శ్యామ్''. 1970స్ బ్యాక్ డ్రాప్ లో రాధాకృష్ణ కుమార్ తెరకెక్కిస్తున్న ఈ సినిమాని పాన్ ఇండియా స్థాయిలో జులై 30న రిలీజ్ చేయనున్నారు. అయితే ఇప్పుడు 'రాధే శ్యామ్' చిత్రానికి పోటీగా బాలీవుడ్ బ్యూటీ ఆలియా భట్‌ బాక్సాఫీస్ బరిలో దిగుతోంది. ఆమె ప్రధాన పాత్రలో బాలీవుడ్ దర్శకుడు సంజయ్‌లీలా భన్సాలీ తెరకెక్కిస్తున్న 'గంగూబాయి కతియావాడి' సినిమాని జులై 30న విడుదల చేయనున్నట్లు తాజాగా ప్రకటించారు.

''గంగూబాయి కతియావాడి'' సినిమా హుస్సేన్‌ జైదీ రచించిన 'మాఫీయా క్వీన్స్‌ ఆఫ్‌ ముంబై' లోని 'మేడమ్‌ ఆఫ్‌ కామతిపుర' ఆధారంగా రూపొందుతోంది. ముంబైలో వేశ్యగా పనిచేసే మహిళ ఆధారంగా ఈ సినిమా ఉంటుంది. బాలీవుడ్ స్టార్ అజయ్‌ దేవగణ్‌ ఇందులో ఒక ముఖ్యపాత్రలో నటిస్తుండటం విశేషం. ఇప్పటికే విడులైన 'గంగూబాయి' ప్రచార చిత్రాల్లో ఆలియా స్టన్నింగ్‌ లుక్‌ తో ఆకట్టుకుంది. అయితే ఇప్పుడు ఉన్నట్టుండి ప్రభాస్ సినిమాకి పోటీగా విడుదల చేయడం చర్చనీయాంశంగా మారింది.

వాస్తవానికి అలియా చిత్రం దక్షిణాది రాష్ట్రాల్లో పాన్ ఇండియా 'రాధే శ్యామ్‌'కు అసలు పోటీయే కాదని చెప్పవచ్చు. కాకపోతే 'ఆర్.ఆర్.ఆర్' లో నటిస్తుండటంతో అమ్మడిపై దృష్టి పడే ఛాన్సెస్ ఉన్నాయి. ఇకపోతే నార్త్ లో 'గంగూబాయి' ప్రభాస్ సినిమాపై ప్రభావం చూపే అవకాశం లేకపోలేదు. సంజయ్ లీలా బన్సాలీ - అలియా భట్ క్రేజ్ జనాలను థియేటర్స్ కి రప్పించే ఛాన్స్ ఉంది. మరోవైపు 'బాహుబలి' 'సాహో' సినిమాలతో బాలీవుడ్ బాక్సాఫీస్ ని షేక్ చేసిన ప్రభాస్ -హీరోయిన్ పూజా హెగ్డే - టీ సిరీస్ వారు ఇలా అనేక అంశాలు 'రాధే శ్యామ్' కి అనుకూలంగా ఉన్నాయి. ఈ నేపథ్యంలో పాన్ ఇండియా మూవీ 'రాధే శ్యామ్'కు ట్రిపుల్ ఆర్ బ్యూటీ ఏమాత్రం పోటీనిస్తుందో చూడాలి.