గండిపేటలో 'RRR' షూట్.. బ్యాక్ టూ బ్యాక్ షెడ్యూల్స్ ప్లాన్ చేసిన జక్కన్న..!

దర్శకధీరుడు రాజమౌళి ప్రతిష్టాత్మకంగా తెరకెక్కిస్తున్న ‘ఆర్.ఆర్.ఆర్’ సినిమా విడుదల ఎప్పుడని యావత్ సినీ అభిమానులు ఆసక్తిగా ఎదురుచూస్తున్నారు. యంగ్ టైగర్ ఎన్టీఆర్ - మెగా పవర్ స్టార్ రామ్ చరణ్ హీరోలుగా పాన్ ఇండియా స్థాయిలో రూపొందుతున్న ఈ సినిమాని అంచనాలు కూడా ఓ రేంజ్ లో ఉన్నాయి. ఇప్పటికే మెజారిటీ భాగం షూటింగ్ జరుపుకున్న ఈ చిత్రాన్ని వీలైనంత త్వరగా పూర్తి చేయాలని జక్కన్న ప్లాన్ చేస్తున్నారు.

కరోనా సెకండ్ వేవ్ పరిస్థితులు చక్కబడుతుండటంతో 'ఆర్.ఆర్.ఆర్' షూట్ తిరిగి ప్రారంభించడానికి సన్నాహాలు చేస్తున్నారు. కోవిడ్ భయం ఉన్నప్పటికీ, తగిన జాగ్రత్తలు తీసుకుంటూ సమయం కుదించుకొని బ్యాక్ టు బ్యాక్ షెడ్యూల్స్ చేయాలని జక్కన్న ప్లాన్ చూస్తున్నారట. ఈ సినిమా కారణంగా ట్రిపుల్ ఆర్ నటీనటులందరూ వేరే షూటింగ్స్ స్టార్ట్ చేసే పరిస్థితి లేకపోవడంతో.. ఇకపై సమయం వృధా చేయకూడదని జక్కన్న నిర్ణయించుకున్నారట. అలానే ఈసారి కచ్చితమైన విడుదల తేదీని ప్రకటించాలని ఫిక్స్ అయ్యారట.

ఈ నేపథ్యంలో హైదరాబాద్ లోని గండిపేట వద్ద 'ఆర్.ఆర్.ఆర్' కీలక సన్నివేశాల ప్యాచ్‌ వర్క్‌ కంప్లీట్ చేయనున్నారట. అలానే రామోజీ ఫిల్మ్ సిటీలో ఎన్టీఆర్ - రామ్ చరణ్ లపై ఓ పాట.. చరణ్ - ఆలియా భట్ కాంబినేషన్ లో ఓ రొమాంటిక్ సాంగ్ చిత్రీకరించడానికి ప్రత్యేకంగా సెట్స్ నిర్మాణం చేపట్టినట్లు తెలుస్తోంది. ఈ సినిమా పెండింగ్ షూటింగ్ పూర్తైన వెంటనే కొరటాల శివ సినిమా పనులతో ఎన్టీఆర్ బిజీ కానున్నాడు. మరోవైపు చరణ్ 'ఆచార్య' ను రిలీజ్ కి రెడీ చేసి.. శంకర్ సినిమా స్టార్ట్ చేయనున్నాడు. ఇక రాజమౌళి.. మహేష్ బాబు సినిమా కోసం స్క్రిప్ట్ మీద వర్క్ చేయనున్నాడు.