ఈమధ్య కాలంలో ఆడియన్స్ ను ఫుల్లుగా ఆకర్షించడంతో పాటు బాక్స్ ఆఫీస్ కలెక్షన్లతో బయ్యర్లును - డిస్ట్రిబ్యూటర్లను దిల్ ఖుష్ చేసిన సినిమా 'RX 100'. కొత్త హీరో - హీరోయిన్లు కార్తికేయ - పాయల్ రాజ్ పుత్ లతో నూతన దర్శకుడు అజయ్ భూపతి రూపొందించిన ఈ సినిమా ఇంకా కూడా తెలుగు రాష్ట్రాల్లో కొన్ని థియేటర్లలో సినిమా రన్ అవుతుండడం విశేషం. రిలీజ్ అయి మూడు వారాలు దాటినా ఇంకా డీసెంట్ షేర్ ను రాబడుతోంది.
రెండున్నర కోట్ల లోపు బడ్జెట్ తో తెరకెక్కిన ఈ సినిమా 12 కోట్ల రూపాయల షేర్ ను రాబట్టి సంచలనం సృష్టించింది. తాజాగా ఈ సినిమా హైదరాబాద్ లోని ఆర్టీసీ క్రాస్ రోడ్స్ లోని ఓ థియేటర్లో 50 లక్షలకు పైగా గ్రాస్ సాధించి రికార్డు సృష్టించింది. ఆ థియేటర్ దేవి 70 ఎం ఎం. ఆర్టీసీ క్రాస్ రోడ్స్ లో ఉన్న థియేటర్లలో భారీ కెపాసిటీ ఉన్న థియేటర్ ఇది. ఒక హౌస్ ఫుల్ కి 1.35 లక్షల రూపాయల గ్రాస్ వస్తుందంటే ఈ థియేటర్ కెపాసిటీ అర్థం చేసుకోవచ్చు. అలాంటి థియేటర్లో RX 100 మొదటి వారంలోనే 28 లక్షలకు పైగా గ్రాస్ సాధించి అందరినీ ఆశ్చర్యంలో ముంచెత్తింది. ఇప్పుడు రూ. 50 లక్షల గ్రాస్ మార్కు చేరుకొని RX 100 ఏ రేంజ్ విజయమో చాటి చెప్పింది.
ఈ థియేటర్లో కోటి రూపాయలకు పైగా గ్రాస్ వసూలు చేసిన స్టార్ హీరోల సినిమాలు ఉన్నాయి.. కానీ ఒక స్మాల్ బడ్జెట్ సినిమా రూ. 50 లక్షల గ్రాస్ మార్కు చేరడం సామాన్యమైన విషయం కాదు. మొత్తానికి ఇలాంటి ఘనతను మొదటి సినిమాతోనే సాధించి వర్మ శిష్యుడు అజయ్ భూపతి ఘటికుడనిపించాడు.