'సాహో' ఓవ‌ర్సీస్ స్కైలో?

2019 మోస్ట్ అవైటెడ్ మూవీగా `సాహో` పేరు మార్మోగిపోతోంది. ఇండియాలో నెవ్వ‌ర్ బిఫోర్ అనిపించే భారీ యాక్ష‌న్ ఎంట‌ర్‌టైన‌ర్ ని తెర‌కెక్కిస్తున్నారు. సుజీత్ ఈ చిత్రానికి ద‌ర్శ‌క‌త్వం వ‌హిస్తున్నారు. యువి.క్రియేష‌న్స్ సంస్థ దాదాపు 225 కోట్ల బ‌డ్జెట్ ని ఖ‌ర్చు చేస్తోంది. అయితే ఈ సినిమా ప్రీరిలీజ్ బిజినెస్ ఎలా ఉంది? అంటే తెలుగు రాష్ట్రాలు స‌హా ఓవ‌ర్సీస్ లో ప్ర‌స్తుతం బేర‌సారాలు సాగుతున్నాయ‌ని తెలుస్తోంది. `బాహుబ‌లి` సిరీస్ అసాధార‌ణ స‌క్సెస్ నేప‌థ్యంలో `సాహో`కి మేక‌ర్స్ భారీ మొత్తాల్నే కోట్ చేస్తున్నార‌ట‌. ఇదివ‌ర‌కూ సాహో హిందీ శాటిలైట్స్ కి దాదాపు 90 కోట్ల మేర ప‌లికింద‌న్న చ‌ర్చా సాగింది.

`సాహో` ప్రీరిలీజ్ బిజినెస్ విష‌యంలో యు.వీ. క్రియేష‌న్స్‌ సంస్థ ఏమాత్రం త‌గ్గ‌డం లేద‌ట‌. `షేడ్స్ ఆఫ్ సాహో మేకింగ్ 1` సంచ‌ల‌నాల త‌ర్వాత అదిరిపోయే ఆఫ‌ర్ వ‌చ్చింది. ప్ర‌ఖ్యాత టీ సిరీస్ సాహో టీమ్ కి అద్భుత‌మైన‌ ఆఫ‌ర్ ఇచ్చింద‌ని వార్త‌లొచ్చాయి. సాహో తెలుగు - త‌మిళం - మ‌ల‌యాళం - హిందీ వెర్ష‌న్ల థియేట్రిక‌ల్ రైట్స్ కి గంప‌గుత్త‌గా రూ.240 కోట్లు ఆఫ‌ర్ చేసింద‌ని ప్ర‌చార‌మైంది. అయితే ఆ ఆఫ‌ర్ ని యువి క్రియేష‌న్స్ సంస్థ రిజెక్ట్ చేసింద‌ని 350 కోట్లు డిమాండ్ చేసింద‌ని వేరొక ప్ర‌చారం తెర‌పైకి వ‌చ్చింది. ప్ర‌స్తుతం `షేడ్స్ ఆఫ్ సాహో` మేకింగ్ 2 యూట్యూబ్ - సామాజిక మాధ్య‌మాల్లో జెట్ స్పీడ్ తో దూసుకుపోతోంది. అభిమానుల నుంచి అద్భుత స్పంద‌న వ‌చ్చింది. ఆ క్ర‌మంలోనే ఓవ‌ర్సీస్ డీల్ గురించి ముచ్చ‌ట సాగుతోంద‌ట‌.

`సాహో` ఓవ‌ర్సీస్ నిర్మాత‌లు ఎంత డిమాండ్ చేస్తున్నారు? అంటే... అమెరికా స‌హా విదేశాల‌కు సంబంధించి హ‌క్కుల కోసం యు.వి.సంస్థ 45 కోట్లు డిమాండ్ చేస్తోంద‌ట‌. అయితే ఇంత పెద్ద మొత్తం రాబ‌ట్టాలంటే మ‌రోసారి `బాహుబ‌లి` రేంజులో వ‌సూళ్ల దూకుడు ప్ర‌ద‌ర్శించాల్సి ఉంటుంది. బాహుబ‌లి చిత్రం 10 మిలియ‌న్ డాల‌ర్స్ (70) క్ల‌బ్ లో చేరింది. అంత దూకుడు `సాహో` చూపిస్తేనే అది వ‌ర్క‌వుట‌వుతుంద‌ని అంచ‌నా వేస్తున్నారు. ప్ర‌స్తుతానికి ప్ర‌ముఖ ఓవ‌ర్సీస్ డిస్ట్రిబ్యూష‌న్ సంస్థ హ‌క్కుల విష‌య‌మై చ‌ర్చ‌లు సాగిస్తోంద‌ట‌. త్వ‌ర‌లోనే డీల్ కుదిరే వీలుంద‌ని చెబుతున్నారు. స్వాతంత్య్ర దినోత్స‌వ కానుక‌గా ఆగ‌స్టు 15న సాహో చిత్రాన్ని రిలీజ్ చేస్తున్న సంగ‌తి తెలిసిందే.