ఆ ఆటల లిస్ట్ లోకి ఆలీ కూడా..

స్పోర్ట్స్ పై వచ్చే సినిమా స్టోరీలకు బాలీవుడ్ బ్రహ్మరథం పడుతోంది. గతంలో పీరియాడికల్ చిత్రాలను దూరం పెట్టిన ఇండస్ట్రీ జనాలు.. ఇప్పుడు వరుసగా అవే సినిమాలతో దంచేస్తున్నారు. ఆటలపై అయితే తామరతంపరగా సినిమాలొచ్చేస్తున్నాయి.

అప్పట్లో చక్ దే ఇండియాలో హాకీ గేమ్ ని చూపించారు. తర్వాత కొంత గ్యాప్ తో వచ్చిన మేరీ కోమ్ లో బాక్సింగ్ పై సినిమా తీశారు. రన్నింగ్ పై తీసిన భాగ్ మిల్కా భాగ్ భారీ సక్సెస్ సాధించింది. రీసెంట్ గా కుస్తీపోటీలపై సల్మాన్ సుల్తాన్ సాధించిన విజయం ప్రత్యక్షంగా చూశాం. అజార్.. సచిన్.. ధోనీలపై సినిమాలు తీస్తూ క్రికెట్ ని కూడా చూపించేస్తున్నారు. ఇప్పుడీ లిస్ట్ లోకి గోల్ఫ్ కూడా వచ్చేస్తోంది.

ఫ్రీకీ ఆలీ అనే టైటిల్ పై రూపొందుతున్న మూవీని.. సల్మాన్ కాన్ నిర్మిస్తున్నాడు. ఇందులో నవాజుద్దీన్ సిద్ధిఖీ.. అమీ జాక్సన్ లు నటిస్తుండగా.. సల్మాన్ ఖాన్ ప్రొడక్షన్స్ బ్యానర్ పై రూపొందుతున్న మూడో చిత్రం ఇది. ఇప్పుడీ మూవీకి సంబంధించిన ఫస్ట్ లుక్ ని సల్మాన్ ట్విట్టర్ లో రిలీజ్ చేశాడు.  ‘ధనవంతుల ఆటలో ఓ పేదవాడు విజయం సాధించి.. గేమ్ ఛేంజర్ గా మారాడు’ అంటూ సల్మాన్ ఈ సినిమా గురించి క్రిస్ప్ గా వివరించాడు.

సల్మాన్ రాసిన ట్వీట్.. ఫ్రీకీ ఆలీకి ట్యాగ్ లైన్ కూడా. ఓ పేదవాడు తన ప్రేమ కోసం గోల్ఫ్ స్పోర్ట్ లోకి అడుగుపెట్టి ఎలా ఛాంపియన్ అయ్యాడనేదే ఈ సినిమా.