అదేంటో.. సల్మాన్ సినిమా అంటే ప్రతీ మ్యాటర్ అతని మెడ‌కే చుట్టుకుంటుంది..!

బాలీవుడ్ స్టార్ హీరో సల్మాన్ ఖాన్ నటించిన లేటెస్ట్ మూవీ ''రాధే'' - యువర్ మోస్ట్ వాంటెడ్ భాయ్. ప్రభుదేవా దర్శకత్వంలో తెరకెక్కిన ఈ చిత్రాన్ని ఇటీవలే థియేట్రికల్ రిలీజ్ తో పాటుగా డిజిటల్ రిలీజ్ చేశారు. అయితే ఈ సినిమాకి ప్రేక్షకుల నుంచి మిశ్రమ స్పందన వచ్చింది. అయినప్పటికీ ఓటీటీలో మంచి వ్యూస్ రాబట్టింది. రూ.249 టికెట్ ధర పెట్టడంతో ఫస్ట్ వీక్ లో బాగానే వసూళ్ళు రాబట్టినట్లు ట్రేడ్ వర్గాలు అంచనా వేస్తున్నాయి. అయితే హ్యాపీగా లైఫ్ లీడ్ చేస్తున్న స‌ల్లూభాయ్ కి ఇప్పుడు 'రాధే' రూపంలో కొత్త చిక్కులు వ‌చ్చిప‌డుతున్నాయి.

'రాధే' సినిమాలో కొన్ని పాట‌ల్లో ఆడ‌వాళ్ల‌ని సెట్ ప్రాప‌ర్టీలుగా ట్రీట్ చేసే విధంగా చిత్రీక‌ర‌ణ‌లు జ‌రిపార‌ని కొన్ని మ‌హిళ మండ‌లి బృందాలు అభ్యంతరం వ్యక్తం చేశారు. ఈ నేపథ్యంలో 'రాధే' సినిమాను అంతటా బ్యాన్ చేయాల‌ని నినాదాలు మొదలుపెట్టారు. ప్రస్తుతం మీడియా అంతా క‌రోనా వార్తల మీద ఉండ‌టంతో ఈ ఇష్యూ వెలుగులోకి రాలేదు. సల్మాన్ ఇందులో హీరో అవడంతో 'రాధే' కి సంబంధించిన ప్ర‌తి మ్యాటర్ కూడా అతని మెడ‌కే చుట్టుకుంటుందనే కామెంట్స్ వినిపిస్తున్నాయి.

నిజానికి 'రాధే' విడుదలకు ముందే ఈ చిత్రాన్ని బ్యాన్ చేయాలంటూ సోషల్ మీడియాలో పెద్ద ఎత్తున పోస్టులు వెలిశాయి. దివంగత సుశాంత్ సింగ్ రాజ్‌ పుత్ సపోర్టర్స్ దీనిపై ట్విట్టర్ లో నెగెటివ్ ట్రెండ్ కూడా చేశారు. మరి రాబోయే రోజుల్లో సల్మాన్ ఖాన్ నటించే సినిమాల విషయంలో ఎలాంటి అబ్జెక్షన్స్ వస్తాయో చూడాలి. ఇకపోతే సల్మాన్ ప్రస్తుతం 'అంతిమ్:ది ఫైనల్ తట్రూత్' 'టైగర్ 3' సినిమాలలో నటిస్తున్నారు.