సప్తగిరి పెళ్లికాని ప్రసాద్.. ట్రైలర్ ఎలా ఉందంటే..

టాలీవుడ్‌లో కామెడీ బ్యాక్ డ్రాప్ లో తెరకెక్కిన సినిమాలకు ఎల్లప్పుడూ డిమాండ్ ఉంటుంది. ఇక అలాంటి జానర్‌లో మంచి కామెడీ టైమింగ్ ఉన్న సప్తగిరి ప్రధాన పాత్రలో నటిస్తున్న తాజా చిత్రం పెళ్లికాని ప్రసాద్. ఎప్పుడూ వెండితెరపై నవ్వులు పూయించే అతను, ఈసారి హీరోగా తనదైన స్టైల్‌లో ఫుల్ ఎంటర్టైన్మెంట్ అందించేందుకు సిద్ధమవుతున్నాడు. మార్చి 21న థియేటర్లలో ప్రేక్షకులను అలరించబోతున్న ఈ సినిమాకు అభిలాష్ రెడ్డి గోపిడి దర్శకత్వం వహించారు. ఇక లేటెస్ట్ గా విడుదలైన ట్రైలర్ సినిమాపై అంచనాలను అమాంతం పెంచేసింది.

ట్రైలర్ చూస్తే సినిమా ప్రధానంగా హీరోకు పెళ్లి కావట్లేదు అనే సున్నితమైన అంశాన్ని కామెడీగా చూపించబోతున్నట్లు కనిపిస్తోంది. 36 ఏళ్ల వయసులోనూ పెళ్లి కాకుండా మిగిలిపోయిన ఓ వ్యక్తి జీవితంలో ఎదురయ్యే పరిస్థితులను ఎంటర్టైన్మెంట్ గా రూపొందించారని అనిపిస్తోంది. పెళ్లి ఆలస్యం అవుతున్నప్పుడు కుటుంబ సభ్యులు చెప్పే మాటలు, సమాజం చూపే ప్రెజర్, పెళ్లి విషయంలో వచ్చే ఆశలు, భయాలు అన్నీ ట్రైలర్‌లోనే చూపించారు.

ముఖ్యంగా సప్తగిరి నటన ప్రేక్షకులను కడుపుబ్బా నవ్వించేలా ఉంది. సినిమాలో కామెడీ మాత్రమే కాదు, కొంతవరకు సోషల్ సబ్జెక్ట్‌ను కూడా టచ్ చేశారు. పెళ్లి అనే అంశాన్ని చాలా మందిని ప్రభావితం చేసేలా కథను మలిచిన విధానం ఆసక్తిని రేకెత్తిస్తోంది. అలాగే, వధువు కుటుంబం వారి అంచనాలు, పెళ్లి సంబంధంలో తీసుకునే డిమాండ్లు వంటి అంశాలను చాలా హాస్యంగా ప్రెజెంట్ చేశారు.

టెక్నికల్‌గా కూడా సినిమా ఆకట్టుకునేలా ఉంది. సుజాత సిద్ధార్థ్ సినిమాటోగ్రఫీ సినిమా టోన్‌కి బాగా నప్పింది. కామెడీ సినిమాలకు ముఖ్యంగా బ్యాగ్రౌండ్ స్కోర్ చాలా ముఖ్యం. ఈ విషయాన్ని గమనించి, శేఖర్ చంద్ర అదిరిపోయే సంగీతాన్ని అందించినట్లు ట్రైలర్‌లోనే అనిపిస్తోంది. ఎడిటింగ్ కూడా చాలా క్రిస్ప్‌గా ఉండేలా అనిపిస్తోంది. సినిమాకు సంబంధించిన విజువల్స్, నేపథ్య సంగీతం, డైలాగ్స్ అన్నీ కలిసి హిట్ గ్యారంటీ అనేలా ఉన్నాయి.

కాస్టింగ్ విషయానికి వస్తే, సప్తగిరి మరోసారి తన టైమింగ్‌తో ప్రేక్షకులను గిలిగింతలు పెట్టేలా ఉన్నాడు. ఆయన పాత్రలోని కామెడీ, ఎమోషన్ ట్రైలర్‌లోనే హైలైట్ అయ్యాయి. కథానాయిక ప్రియాంకా శర్మకూ మంచి ప్రాముఖ్యత ఉన్న పాత్ర దక్కినట్లు స్పష్టంగా కనిపిస్తోంది. మురళీధర్ గౌడ్, లక్ష్మణ్ వంటి సహాయ నటీనటుల పర్ఫార్మెన్స్ సినిమాకి మరింత బలం చేకూర్చేలా ఉంది. మొత్తానికి పెళ్లికాని ప్రసాద్ ట్రైలర్ సినిమాపై మంచి అంచనాలు ఏర్పరిచింది. ట్రైలర్ ద్వారా వచ్చిన హైప్ సినిమా రిలీజ్ వరకు కొనసాగితే, కామెడీ సినిమాల్ని ఆదరించే ప్రేక్షకులకు మరో మంచి ఫన్ ఎంటర్టైనర్‌గా నిలిచే అవకాశం ఉంది. మార్చి 21న ఈ సినిమా థియేటర్లలో ప్రేక్షకులను నవ్వించేందుకు సిద్ధంగా ఉంది. మరి సినిమా బిగ్ స్క్రీన్ పై ఎలాంటి ఫలితాన్ని అందుకుంటుందో చూడాలి.