ఫస్ట్ లుక్: ఇన్ స్పెక్టర్ రంజిత్ కుమార్ వచ్చాడు

ఇన్ స్పెక్టర్ రంజిత్ కుమార్ అనగానే చాలామందికి ‘కొండవీటి సింహం’ సినిమాలో ఎన్టీఆర్ పోషించిన పవర్ ఫుల్ పోలీస్ రోల్ గుర్తుకొస్తుంది. అప్పట్లో ఈ పేరు భలే పాపులర్. ఆ సినిమా చూసి ఎంతోమంది ఈ పేరు పెట్టుకున్నారు. ఇప్పుడు ఇదే పేరుతో ఓ హీరో వస్తున్నాడు. ఆ హీరో కూడా ఇన్ స్పెక్టరే కావడం విశేషం. నలుగురు యువ కథానాయకులు కలిసి నటిస్తున్న ఇంట్రెస్టింగ్ మల్టీస్టారర్ ‘శమంతకమణి’కి సంబంధించిన ఫస్ట్ లుక్ పోస్టర్లలో మొదటిది రిలీజైంది. నారా రోహిత్ పోషిస్తున్న ఇన్ ప్పెక్టర్ రంజిత్ కుమార్ ఫస్ట్ లుక్ ను లాంచ్ చేశారు. ఈ లుక్ ఇంప్రెసివ్ గా ఉంది.

నారా రోహిత్ కెరీర్లో ఎక్కువగా చేసినవి పోలీస్ క్యారెక్టర్లే. తొలి సినిమా ‘బాణం’తో పాటు.. ‘రౌడీ ఫెలో’.. ‘అసుర’.. ‘అప్పట్లో ఒకడుండేవాడు’ లాంటి సినిమాల్లో పోలీస్ క్యారెక్టర్లు చేశాడు రోహిత్. ఐతే ఇప్పటిదాకా చేసిన పోలీస్ పాత్రలతో పోలిస్తే ఇది భిన్నమని.. చాలా ప్రత్యేకంగా నిలిచిపోతుందని రోహిత్ తెలిపాడు. మూడు రోజుల కిందట రిలీజైన ‘శమంతకమణి’ మోషన్ పోస్టర్ జనాల్లో క్యూరియాసిటీ పెంచింది. అందులో హీరోల వాయిస్ మాత్రమే వినిపించి.. ఒక పాత కాలం నాటి వింటేజ్ కారు చూపించారు. ఈ కారు పేరే ‘శమంతకమణి’ అని.. దాని నేపథ్యంలోనే సినిమా సాగుతుందని అంటున్నారు. ‘భలే మంచి రోజు’ లాంటి వైవిధ్యమైన చిత్రంతో దర్శకుడిగా పరిచయమైన శ్రీరామ్ ఆదిత్య ఈ చిత్రాన్ని రూపొందిస్తున్నాడు. మిగతా ముగ్గురు హీరోలు సందీప్ కిషన్.. సుధీర్ బాబు.. ఆది సాయికుమార్ లుక్స్ కూడా ఒకదాని తర్వాత ఒకటి రిలీజ్ చేయనున్నారు.

Like Us on Facebook : https://www.facebook.com/Tupakidotcom/