సంపత్.. గోపిలను సీటిమార్ గట్టెక్కిస్తుందా?

కమర్షియల్ సినిమాలకు కేరాఫ్ అడ్రెస్ అయిన దర్శకుడు సంపత్ నంది ప్రస్తుతం యాక్షన్ హీరో గోపిచంద్ తో 'సీటీమార్' అనే సినిమాను తెరకెక్కిస్తున్నారు.  ఈ సినిమా కూడా ఒక కమర్షియల్ ఎంటర్టైనర్ గా తెరకెక్కుతోందని సమాచారం. సంపత్ నంది-గోపిచంద్ కాంబినేషన్లో గతంలో 'గౌతమ్ నందా' సినిమా తెరకెక్కింది కానీ ఆ సినిమా బాక్స్ ఆఫీసు దగ్గర చేదు ఫలితం అందుకుంది. అయితే గోపిచంద్ ను డిఫరెంట్ గా ప్రెజెంట్ చేసినందుకు సంపత్ కు మంచి పేరే వచ్చింది.  గోపిచంద్ మరోసారి సంపత్ నందికి  అవకాశం ఇవ్వడానికి అదే కారణమని సమాచారం.

ఈ సినిమా విజయం అటు సంపత్ నందికి.. ఇటు గోపిచంద్ కు చాలా కీలకం.  ఎందుకంటే ఇద్దరికి ఒక హిట్ లభించి చాలా కాలం అయింది. వరస ఫెయిల్యూర్లతో గోపిచంద్ మార్కెట్ కూడా తగ్గిపోయింది. గోపి చివరి సినిమా 'చాణక్య' కు మినిమం కలెక్షన్స్ కూడా రాకపోవడం ట్రేడ్ వర్గాలకు షాక్ ఇచ్చింది. మరి ఇలాంటి పరిస్థితిలో 'సీటీమార్' విజయం సాధించడం గోపికి అవసరం.  అయితే సంపత్ సినిమాలలో కథకంటే కమర్షియల్ అంశాలకే పెద్దపీట ఉంటుంది. మరి ఈ జెనరేషన్ ప్రేక్షకులు ఇలాంటి ఫార్మాట్ సినిమా ఎంతమేరకు కనెక్ట్ అవుతుందో వేచి చూడాలి.

ఈ సినిమాపై ఫిలిం సర్కిల్స్ లో కూడా ఇదే రకమైన అనుమానాలు వ్యక్తం అవుతున్నాయి. 'గౌతమ్ నందా' తరహాలోనే ఈ సినిమా కూడా అంచనాలు అందుకోవడంలో విఫలం అవుతుందా లేక ఇద్దరికీ ఒక విజయం అందిస్తుందా అనేది చూడాలి.