స్టార్ హీరోల రికార్డులు బ్రేక్ చేసిన సారంగదరియా..!

ఈరోజుల్లో ఎలాంటి సినిమాలైనా సోషల్ మీడియా ద్వారానే బజ్ క్రియేట్ చేసుకుంటున్నాయి. అందులోను ముఖ్యంగా యూట్యూబ్ అన్నిటికి ప్రధాన వేదికగా మారింది. యూట్యూబ్ లేకపోతే ఈరోజుల్లో సినిమాలు జనాలకు చేరడం కష్టమే అవుతుంది. యూట్యూబ్ లో ఎంతటి సంచలనం సృష్టిస్తే థియేటర్ వద్దకు అంత ఎక్కువగా ప్రేక్షకులు వచ్చే అవకాశం ఉంటుంది. టీజర్, సాంగ్స్, ట్రైలర్ అన్నికూడా యూట్యూబ్ లోనే రిలీజ్ అవుతాయి. ఒక్కోసారి కేవలం ఒక్క సాంగ్ కూడా సినిమా కెరీర్ మార్చేయొచ్చు. ప్రస్తుతం అలాంటి సంచలనమే సృష్టిస్తోంది లవ్ స్టోరీ మూవీలోని సారంగదరియా పాట. జానపదగేయంగా పాపులర్ అయినటువంటి ఈ పాట.. ప్రస్తుతం సినిమాకోసం చేసిన హుషారైన రీమిక్స్ తో స్టార్ హీరోల పాటలను బీట్ చేస్తోంది.

ప్రస్తుతం ఆదిత్య మ్యూజిక్ ద్వారా రిలీజై యూట్యూబ్ ట్రెండింగ్ సాంగ్స్ లో లేటెస్ట్ 'సారంగదరియా' సాంగ్ రికార్డులు క్రియేట్ చేస్తోంది. ఫిబ్రవరి 28న రిలీజ్ చేసిన ఈ పాట కేవలం నెల రోజుల్లోనే 100 మిలియన్స్ పైగా వ్యూస్ రాబట్టి స్టార్ హీరోలు దళపతి విజయ్(వాతి కమింగ్ 54రోజులు), స్టైలిష్ స్టార్ అల్లు అర్జున్ (బుట్టబొమ్మ 40రోజులు) సాంగ్స్ రికార్డులను బ్రేక్ చేసింది. అలాగే 1మిలియన్ పైగా లైక్స్ సొంతం చేసుకుని ట్రెండింగ్ లో ఉంది. ఇదంతా కేవలం హీరోయిన్ సాయిపల్లవి వల్లనే సాధ్యమైందని చెప్పవచ్చు. సాయిపల్లవి ప్రస్తుతం ఇండస్ట్రీలో హాట్ కేక్ లా తయారైంది. ఎందుకంటే ఆమె ఏ సినిమా ఓకే చేసినా ఆ సినిమాకు సగం బజ్ ఆల్రెడీ సెట్ అయిపోతుంది. ఇదిలా ఉండగా.. నాగచైతన్య, సాయిపల్లవి ప్రధానపాత్రల్లో నటించిన 'లవ్ స్టోరీ' మూవీని క్లాస్ డైరెక్టర్ శేఖర్ కమ్ముల తెరకెక్కించాడు. ఏప్రిల్ 16న సినిమా విడుదలకు సిద్ధం అవుతోంది.