బాలీవుడ్ అంతా ఎప్పుడెప్పుడా అని ఎదురు చూస్తున్న ‘దిల్ వాలే’ ట్రైలర్ వచ్చేసింది. నిన్న సాయంత్రం నుంచి సోషల్ మీడియాలో ఎక్కడ చూసినా ఈ ట్రైలర్ గురించే చర్చ. తనను బాలీవుడ్ బాద్ షా అని, కింగ్ ఖాన్ అని ఎందుకంటారో మరోసారి రుజువు చేశాడు షారుఖ్ ఖాన్. తనకే సాధ్యమైన స్క్రీన్ ప్రెజెన్స్ తో మరోసారి అతను ఇండియన్ ఆడియన్స్ ని మెస్మరైజ్ చేయబోతున్నాడని ఈ ట్రైలర్ చూస్తే అర్థమైపోతుంది. ఇక ఇండియన్ స్క్రీన్ మీద షారుఖ్ - కాజోల్ ల కంటే అద్భుతమైన జంట మరొకటి ఉండదని కూడా ఈ ట్రైలర్ చాటి చెప్పింది.
నదిలో షారుఖ్ - కాజల్ కలిసి దగ్గరకు వచ్చి ఎమోషనల్ డైలాగులు చెప్పే సన్నివేశం చూస్తే.. ఇవి రెండు దశాబ్దాల కిందట వచ్చిన ‘దిల్‌వాలే దుల్హానియా లే జాయేంగే’ విజువల్సేమో అన్న ఆశ్చర్యం కలగక మానదు. ఎందుకంటే షారుఖ్ - కాజోల్ అచ్చం ఆ బ్లాక్ బస్టర్ సినిమాలో కనిపించినట్లే కనిపించారు. వాళ్లిద్దరూ ఏదైనా ఔషదం తాగి మళ్లీ యవ్వనంలోకి వెళ్లిపోయారా అని ఆశ్చర్యం కలిగేలా ఉంది ఆ సన్నివేశం.
ముఖ్యంగా షారుఖ్ అయితే అచ్చంగా ‘దిల్‌వాలే దుల్హానియో’లో లాగే కనిపించాడు. ఆ సినిమా తర్వాత చాలా ఏళ్ల విరామం తర్వాత ‘మై నేమ్ ఈజ్ ఖాన్’లో కనిపించిన షారుఖ్ - కాజోల్ జంట అందులో పెద్దగా ఆకట్టుకోలేదు. ఐతే ‘దిల్‌వాలే’లో మాత్రం వీళ్ల జంట మరోసారి కనువిందు చేయబోతోందనడంలో సందేహం లేదు. ట్రైలర్ అంత ప్రామిసింగ్ గా అనిపించింది. రోహిత్ శెట్టి దర్శకత్వం వహించిన ఈ సినిమా డిసెంబరు 18న ప్రేక్షకుల ముందుకు రానుంది.