ఒకే ఫ్రేమ్ లో ఇద్ద‌రు బాద్షాహ్ లు ...వైర‌ల్!

భార‌త్ లో కోట్లాది మంది అభిమానులు క్రికెట్ దేవుడిగా ప‌రిగ‌ణించే మాస్ట‌ర్ బ్లాస్ట‌ర్ స‌చిన్ టెండూల్క‌ర్ ఒక వైపు.....కోట్లాదిమంది అభిమానులున్న బాలీవుడ్ బాద్షాహ్  షారుఖ్ ఖాన్ మ‌రోవైపు....ఈ ఇద్దరు బాద్షాహ్ లు ఒకే చోట క‌ల‌వ‌డమే చాలా అరుదుగా జ‌రుగుతుంది....అటువంటిది వీరిద్ద‌రూ ఓ కార్య‌క్రమంలో పాల్గొన‌డ‌మే కాకుండా సెల్ఫీ దిగి సంద‌డి చేశారు. రిల‌య‌న్స్ అధినేత ముకేష్ అంబానీ కుమారుడు ఆకాష్ అంబానీ - శ్లోకా మెహ‌తాల ప్రీ-ఎంగేజ్ మెంట్ వేడుకలో ఈ ఇద్ద‌రు స్టార్ లు త‌ళుక్కున మెరిశారు. సోమ‌వారం రాత్రి జ‌రిగిన ఈ కార్య‌క్రమంలో షారుఖ్ తో క‌లిసి దిగిన సెల్ఫీని స‌చిన్ త‌న ఇన్ స్టా గ్రామ్ ఖాతాలో పోస్ట్ చేశాడు. ``జ‌బ్ ఎస్ ఆర్ కే మెట్ ఎస్ ఆర్ టీ ``అని క్యాప్ష‌న్ పెట్టాడు. స‌చిన్ పోస్ట్ చేసిన కొద్ది సేప‌టికే ఆ ఫొటో సోష‌ల్ మీడియాలో వైర‌ల్ అయింది. ఇప్ప‌టికి 9 ల‌క్ష‌ల మంది ఆ ఫొటోను లైక్ చేయ‌గా...వేలాది మంది ఆ ఫొటోపై కామెంట్స్ పెట్టారు.

ఆ వేడుక‌కు హాజ‌రైన వారంతా టోపీలు ధ‌రించాల్సిందిగా అంబానీ ఫ్యామిలీ కోరింది. దీంతో, అంబానీ ఇచ్చిన టోపీల‌ను ఆ వేడుక‌కు వ‌చ్చిన అతిర‌థ మ‌హార‌ధులంతా ధ‌రించారు. స‌చిన్ - షారుఖ్ కూడా టోపీలు ధ‌రించి సెల్ఫీ దిగారు. ఆ ఫొటోను చూసిన నెటిజ‌న్లు తెగ సంబ‌ర‌ప‌డిపోతున్నారు. కింగ్ ఆఫ్ క్రికెట్ - కింగ్ ఆఫ్ యాక్టింగ్...ఇద్ద‌రినీ ఒకే ఫ్రేమ్ లో చూడ‌డం చాలా ఆనందంగా ఉంద‌ని ఒక‌రు కామెంట్ పెట్టారు. ఇద్ద‌రు లివింగ్ లెజెండ్స్ ఒకే చోట చేరి సంద‌డి చేయ‌డం...సెల్ఫీ దిగ‌డం...చాలా అరుదుగా జ‌రుగుతుందంటూ మ‌రొకరు కామెంట్ చేశారు. అయితే, స‌చిన్..షారుక్ లు ఒకే ఫ్రేమ్ లో క‌నిపించ‌డం ఇది మొద‌టిసారేమీ కాదు. 1999 క్రికెట్ ప్రపంచ‌క‌ప్ సంద‌ర్భంగా ఓ శీత‌ల పానీయం త‌యారీ కంపెనీ...రూపొందించిన యాడ్ లో వీరిద్ద‌రూ క‌లిసి న‌టించారు.