శ్రుతి టాలీవుడ్ రీఎంట్రీ ఇలా!

అందాల శ్రుతిహాస‌న్ తెలుగు తెర‌కు దూర‌మై దాదాపు నాలుగేళ్ల‌వుతోంది. రేసుగుర్రం.. శ్రీ‌మంతుడు చిత్రాల త‌ర్వాత ఈ బ్యూటీ న‌టించిందే లేదు. ఆ క్ర‌మంలోనే తిరిగి తెలుగు ప్రేక్ష‌కుల ముందుకు ఎప్పుడొస్తుంది? అంటూ అభిమానుల్లో ఆస‌క్తిక‌ర చ‌ర్చ సాగింది. అయితే తాను వ్య‌క్తిగ‌త జీవితానికే ప్రాధాన్య‌త‌నిస్తున్నా అంటూ ప్రియుడు మైఖేల్ కోర్స‌లేతో ప్రేమాయ‌ణంలో బిజీ అయిపోయింది. ఇటీవ‌లే మేఖేల్ తో బ్రేక‌ప్ అయ్యాక తిరిగి కెరీర్ పై దృష్టి సారించ‌డం హాట్ టాపిక్ గా మారింది.

ఓవైపు త‌మిళ్ - తెలుగు సినిమాల‌కు క‌మిట‌వుతూనే హిందీలోనూ న‌టించేందుకు శ్రుతి ప్ర‌ణాళిక‌లు సిద్ధం చేస్తోంది. ఇటీవ‌లే ఓ తెలుగు సినిమాలో న‌టించ‌బోతున్నాన‌ని బాలీవుడ్ మీడియాకి వెల్ల‌డించిన శ్రుతి అప్ప‌టికి స‌స్పెన్స్ లీడ్ చేసింది. అయితే ఆ సినిమా ఏదో తాజాగా రివీలైపోయింది. మాస్ మ‌హారాజా ర‌వితేజ క‌థానాయ‌కుడిగా గోపిచంద్ మ‌లినేని ద‌ర్శ‌క‌త్వంలో ఠాగూర్ మ‌ధు నిర్మించ‌నున్న తాజా చిత్రంలో శ్రుతి నాయిక‌గా ఫైన‌ల్ అయ్యింద‌ని తెలుస్తోంది.

ఇప్ప‌టికే శ్రుతిహాస‌న్ కి అడ్వాన్స్ కూడా ఇచ్చేశార‌ట‌. ర‌వితేజ‌- శ్రుతిహాస‌న్ జంటతో ఇదివ‌ర‌కూ మ‌లినేని గోపిచంద్ `బ‌లుపు` చిత్రం తెర‌కెక్కించిన సంగ‌తి తెలిసిందే. మ‌రోసారి సేమ్ కాంబినేష‌న్ ని రిపీట్ చేస్తుండ‌డం ఆస‌క్తిని రేకెత్తిస్తోంది. విన్న‌ర్ చిత్రంతో ఫ్లాప్ ఎదురైనా ఇప్ప‌టికి ర‌వితేజ‌తో మ‌లినేని గోపిచంద్ కి సినిమా ఖాయ‌మైంది.  బుర్రా సాయిమాధ‌వ్ ఈ చిత్రానికి మాట‌లు అందిస్తున్నార‌ని తెలుస్తోంది. ర‌వితేజ న‌టిస్తున్న డిస్కోరాజా చిత్రీక‌ర‌ణ పూర్త‌య్యాక ఈ సినిమా సెట్స్ కెళుతుంద‌ట‌.