'శ్యామ్ సింగ రాయ్' ఫస్ట్ లుక్: బెంగాలీ లుక్ లో సర్ప్రైజ్ చేసిన నాని..!

నేచురల్ స్టార్ నాని నటిస్తున్న లేటెస్ట్ మూవీ ''శ్యామ్ సింగ రాయ్''. 'టాక్సీవాలా' ఫేమ్ రాహుల్ సాంకృత్యాన్ ఈ చిత్రానికి దర్శకత్వం వహిస్తున్నాడు. నిహారిక ఎంటర్టైన్మెంట్స్ బ్యానర్ పై వెంకట్‌ బోయనపల్లి ఈ చిత్రాన్ని నిర్మిస్తున్నారు. ఇందులో నేచురల్ బ్యూటీ సాయి పల్లవి - గార్జియస్ కృతి శెట్టి - మడోన్నా సెబాస్టియన్ హీరోయిన్లుగా నటిస్తున్నారు. ఈ చిత్రం కలకత్తా బ్యాక్ డ్రాప్ లో యూనిక్ కాన్సెప్ట్ తో హై వోల్టేజ్ యాక్షన్ ఎంటర్టైనర్ గా రూపొందుతోంది. నేడు హీరో నాని పుట్టినరోజు సందర్భంగా 'శ్యామ్ సింగ రాయ్' ఫస్ట్ లుక్ ను చిత్ర యూనిట్ విడుదల చేసింది.

నాని ఇందులో బెంగాలీ వ్యక్తిగా అద్భుతమైన మేక్ ఓవర్‌ తో కనిపించి అందర్నీ సర్ప్రైజ్ చేసాడు. హెయిర్ స్టైల్ నుండి డ్రెస్సింగ్ వరకు నిజంగా అతను ఒక బెంగాలీ అనుకునే విధంగా కనిపిస్తున్నాడు. ఇక ఈ పోస్టర్ లో ఒక అమ్మాయి నానిని వెనుక నుంచి  ఆప్యాయంగా కౌగిలించుకోవడం చూస్తుంటే ఈ సినిమాలో లవ్ స్టోరీని కూడా చెప్పబోతున్నారని తెలుస్తోంది. మొత్తం మీద నాని ఇంతకముందు చేయని ఛాలెంజింగ్ రోల్ లో నటిస్తున్నాడని అర్థం అవుతోంది. ఈ ఫస్ట్ లుక్ సినిమాపై ఆసక్తిని రెట్టింపు చేసిందని చెప్పవచ్చు.

కాగా, 'శ్యామ్ సింగ రాయ్' సినిమా షూటింగ్ ప్రస్తుతం కలకత్తాలో జరుగుతోంది. సుదీర్ఘ షెడ్యూల్‌ లో ఈ చిత్రంలోని కీలకమైన సన్నివేశాలను చిత్రీకరిస్తున్నారు. ఇందులో హీరోయిన్‌ లతో సహా మొత్తం ప్రధాన తారాగణం పాల్గొంటోంది. రాహుల్ రవీంద్రన్ - మురళీ శర్మ - అభినవ్ గోమటం ఈ చిత్రంలో ముఖ్య పాత్రలు పోషిస్తున్నారు. ఇది నాని కెరీర్లోనే అత్యంత ప్రతిష్టాత్మకంగా హయ్యెస్ట్ బడ్జెట్ తో రూపొందే సినిమా. జంగా సత్యదేవ్ ఈ చిత్రానికి పవర్ ఫుల్ స్టోరీ అందిస్తున్నారు. మెలోడీ సాంగ్స్ స్పెషలిస్ట్ మిక్కీ జె.మేయర్‌ సంగీతం సమకూర్చనున్నాడు. సాను జాన్ వర్గేష్ సినిమాటోగ్రాఫర్ గా వ్యవహరించనుండగా.. నవీన్ నూలి ఎడిటింగ్ వర్క్ చేయనున్నారు.