శింబు ఇంకో డ్రామా మొదలుపెట్టాడు

కోలీవుడ్  మోస్ట్ కాంట్రవర్శల్ హీరో ఎవరు అంటే మరో మాట లేకుండా శిలంబరసన్ అలియాస్ శింబు పేరు చెప్పేయొచ్చు. హీరోయిన్లతో లవ్ ఎఫైర్లు మొదలుకుని.. సినిమాలకు సంబంధించిన గొడవల వరకు శింబు ఎన్నో వివాదాల్లో తలదూర్చాడు. గత ఏడాది నడిగర్ సంఘం ఎన్నికల సందర్భంగా కూడా శింబు వివాదాస్పద వ్యాఖ్యలతో వార్తల్లో నిలిచాడు. విశాల్ ను ఉద్దేశించి అతను చేసిన వ్యాఖ్యలపై దుమారం చెలరేగింది. ఐతే శరత్ కుమార్ కు మద్దతుగా ఎన్నికల్లో నిలబడి సవాళ్లు విసిరిన శింబు.. చివరికి ఎన్నికల్లో ఓడిపోవడంతో సైలెంటైపోయాడు. మళ్లీ ఎప్పుడూ నడిగర్ సంఘం ఊసే ఎత్తలేదు శింబు. ఐతే ఇప్పుడు సడెన్ గా ఓ సరికొత్త డ్రామాకు తెరతీశాడీ యంగ్ హీరో.

తాను నడిగర్ సంఘంలో సభ్యత్వం వదులుకుంటున్నట్లు ప్రకటించాడు శింబు. ఏ ఆర్టిస్టుకైనా సమస్య వచ్చినప్పుడు..దాని పరిష్కారానికి నడిగర్ సంఘం ముందుకు రావాలని.. కానీ తనకు ఈ సంఘం ఏ సహాయం చేయలేదని.. అందుకే తాను సభ్యత్వాన్ని వదులుకుంటున్నానని శింబు చెప్పాడు. ఐతే శింబుకున్న ఇబ్బందులు ఒకటీ రెండూ కాదు. అవి కూడా అతను చేజేతులా తెచ్చుకున్నవే. ఉదాహరణకు బీప్ సాంగ్ వివాదాన్నే తీసుకుంటే.. ఈ పాటకు సంబంధించిన గొడవకు పూర్తిగా అతనే బాధ్యుడు. ఈ విషయంలో శింబుకి నడిగర్ సంఘం మాత్రం ఎలా సపోర్ట్ చేస్తుంది. ఇక అతడి సినిమాలకు సంబంధించిన వివాదాలు కూడా వ్యక్తిగతమైనవి. అయినా ఇవన్నీ శరత్ కుమార్ నడిగర్ సంఘం అధ్యక్షుడిగా ఉన్నపుడు కూడా ఉన్నవే. అప్పుడు లేని అలక శింబుకి ఇప్పుడే ఎందుకొచ్చిందో అర్థం కావడం లేదు. అందుకే ఇదంతా పబ్లిసిటీ స్టంటని కొట్టిపారేస్తున్నారు కోలీవుడ్ జనాలు.