ఆరుగురు వద్దన్న పాత్రకు ఓకే చెప్పింది

అందరూ అన్ని రకాల పాత్రలూ చేయలేరు. కొంచెం బోల్డ్‌గానో, డీగ్లామరస్ క్యారెక్టర్లోనో కనిపించాలంటే చాలామంది హీరోయిన్లు ఒప్పుకోరు. బాలీవుడ్లో ఏక్తా కపూర్ ఓ బోల్డ్ క్యారెక్టర్ కోసం చాలామంది అడిగి విసిగిపోయారు. చివరికి ఓ అమ్మాయి.. ఎలా కనిపించడానికైనా నేను రెడీ అంటూ అగ్రిమెంట్ మీద సంతకం పెట్టి మరీ ఈ సినిమాకు హీరోయిన్‌గా ఎంపికైంది. ఐతే తమిళంలో ఆదిత్య అనే ఓ కొత్త డైరెక్టర్ తన సినిమాలో హీరోయిన్ పాత్ర కోసం చాలామంది హీరోయిన్లను అడిగాడట. ఆరు మంది హీరోయిన్లను ఒకరి తర్వాత ఒకరిని అడుగుతూ వెళ్తే ఎవ్వరూ ఆ పాత్ర చేయడానికి ముందుకు రాలేదట.

చివరికి మలయాళ కుట్టి పూర్ణ ఈ సినిమాకు ఓకే చెప్పింది. పూర్ణకు డేరింగ్ క్యారెక్టర్లు చేయడం ముందు నుంచి అలవాటే. అవును, అవును-2 లాంటి సినిమాల్ని బట్టే ఈ విషయం అర్థమైపోతుంది. తమిళంలో కూడా ఆమె మంచి మంచి పాత్రలు చేసింది. పిశాచి సినిమాతో తెలుగు ప్రేక్షకుల్ని కూడా ఆకట్టుకున్న ప్రముఖ దర్శకుడు మిస్కిన్ ఈ సినిమాలో విలన్ క్యారెక్టర్ చేస్తున్నాడు. ఇదో హీరోయిన్ ఓరియెంటెడ్ సినిమా అని.. పూర్ణ షాకింగ్‌ లుక్‌లో దర్శనమిస్తుందని మిస్కిన్ చెబుతున్నాడు. ఇలాంటి క్యారెక్టర్ చేయడానికి పూర్ణ ఒప్పుకోవడం గొప్ప విషయమని మిస్కిన్ అంటున్నాడంటే పూర్ణకు ఇదేదో సెన్సేషనల్ క్యారెక్టర్ అవబోతోందన్నమాటే.