మ‌ళ్లీ బాబాయ్ కావాలంటున్న చర‌ణ్‌

మెగా ప‌వ‌ర్ స్టార్ రామ్ చ‌ర‌ణ్ కెరియ‌ర్లో ఎప్పుడూ లేనంత హ్యాపీగా ఉన్నాడు ఈ ఏడాది. ఏడాది క‌ష్ట‌ప‌డి సుకుమార్ తో చేసిన  ‘రంగ‌స్థ‌లం’ ఇచ్చిన స‌క్సెస్ ఊపు అలాంటిది మ‌రి. రంగ‌స్థ‌లం త‌ర్వాత మాస్ సినిమాల స్పెష‌లిస్టు బోయ‌పాటి శ్రీ‌ను ద‌ర్శ‌క‌త్వంలో త‌న తాజా సినిమా చేస్తున్నాడు చెర్రీ. ఈ సినిమాలో బాబాయ్ శ్రీ‌కాంత్ తో క‌లిసి మ‌రోసారి న‌టిస్తున్నాడ‌ట రామ్ చ‌ర‌ణ్‌.

శ్రీ‌కాంత్‌... చెర్రీకి బాబాయ్ ఎలా అవుతాడు అనుకుంటున్నారా! వీరిద్ద‌రూ క‌లిసి ఇప్ప‌టికే కృష్ణ‌వంశీ తెర‌కెక్కించిన ఫ్యామిలీ ఎంట‌ర్ టైన‌ర్ ‘గోవిందుడు అంద‌రివాడేలే’ సినిమాలో న‌టించారు. అందులో బాబాయ్‌- అబ్బాయ్ గా మంచి క్రెమిస్ట్రీ పండించారు. మ‌ళ్లీ బోయ‌పాటి సినిమా కోసం క‌లిసి ప‌నిచేస్తున్నారిద్ద‌రూ. బోయ‌పాటి ‘స‌రైనోడు’ సినిమా కోసం శ్రీ‌కాంత్ ని బ‌న్నీకి బాబాయిని చేశాడు. ఆ సినిమాలోనూ బ‌న్నీ- శ్రీ‌కాంత్ మ‌ధ్య స‌న్నివేశాలు సినిమాకే హైలెట్ అయ్యాయి. అందుకే చెర్రీ సినిమా కోసం కూడా ఫ్యామిలీ స్టార్ శ్రీ‌కాంత్ నే ఎంచుకున్నాడ‌ట బోయ‌పాటి. అదీ గాక మెగాస్టార్ చిరంజీవితో శ్రీ‌కాంత్ అనుబంధం వెల‌క‌ట్ట‌లేనిది. ఆయ‌న్ని ముద్దుగా అన్న‌య్య అని పిలుచుకునే శ్రీ‌కాంత్‌... చెర్రీకి బాబాయే క‌దా!

‘గోవిందుడు అంద‌రివాడేలే’ సినిమా బాక్సాఫీస్ ద‌గ్గ‌ర పెద్ద‌గా ప్ర‌భావం చూప‌క‌పోయినా... చెర్రీ కెరీర్లో డిఫ‌రెంట్ సినిమాగా గుర్తింపు పొందింది. ఇప్పుడు బోయ‌పాటి సినిమాలో మాస్ ఎలిమెంట్స్‌తో పాటు ఫ్యామిలీ ఎమోష‌న్స్ కూడా గ‌ట్టిగానే ఉండ‌బోతున్నాయ‌ట‌. ఈ సినిమాలో చెర్రీ స‌ర‌స‌న భ‌ర‌త్ భామ కైరా అద్వాణీ హీరోయిన్ గా న‌టిస్తున్న సంగ‌తి తెలిసిందే.