శివ‌న్న భారీ యాక్షన్ ఇక్క‌డా మెప్పిస్తుందా?

శివ‌రాజ్ కుమార్ అలియాస్ శివన్న న‌టించిన ఇటీవలి కన్నడ బ్లాక్‌బస్టర్ `భైరతి రణగల్` తెలుగు, త‌మిళంలోను విడుద‌ల కానుంది. శాండ‌ల్‌వుడ్ లో విజ‌యం సాధించిన ఈ చిత్రం ఇరుగు పొరుగు భాష‌ల్లోను పెద్ద హిట్ అవుతుంద‌ని శివ‌న్న న‌మ్ముతున్నారు. నార్ట‌న్ దర్శకత్వం వహించిన ఈ చిత్రం భారీ మాస్ యాక్ష‌న్ ఎలిమెంట్స్ తో ర‌క్తి క‌ట్టించ‌నుంద‌ని తాజాగా విడుద‌లైన ట్రైల‌ర్ చెబుతోంది.

నేచురల్ స్టార్ నాని తెలుగు ట్రైలర్‌ను లాంచ్ చేసారు. ట్రైల‌ర్ ఆద్యంతం శివ‌న్న మాస్ యాక్ష‌న్ ఎలిమెంట్స్ తో ర‌క్తి క‌ట్టించారు. ప్రజల పక్షాన నిలబడే ఒక లాయ‌ర్ కార్పొరెట్ ని ఎదుర్కొనేందుకు డాన్‌గా రూపాంతరం చెందిన వైనాన్ని ట్రైల‌ర్ ఆవిష్క‌రించింది. శివన్న త‌న కెరీర్ లోనే ప‌వ‌ర్ ఫుల్ పాత్రలో మెరిశాడు. తెలుగు ట్రైలర్ ఆక‌ట్టుకుంది. ముఖ్యంగా ఈ ట్రైల‌ర్ లో శివన్న యాక్షన్ ఎలివేష‌న్, ర‌వి బస్రూర్ రీరికార్డింగ్ ప్ర‌ధాన హైలైట్స్ గా నిలిచాయి. తెలుగు లోను ఇది విజ‌యం సాధిస్తుందా లేదా వేచి చూడాలి.

మైరా క్రియేషన్స్ ఈ చిత్రాన్ని అదే పేరుతో ( భైరతి రణగల్) తెలుగు వెర్షన్ ని 29 నవంబర్ 29 ప్రేక్షకుల ముందుకు తీసుకొస్తోంది. ఈ చిత్రంలో రుక్మిణి వసంత్, రాహుల్ బోస్, అవినాష్, దేవరాజ్ కీలక పాత్రలు పోషించారు. గీతా పిక్చర్స్ నిర్మించింది. కేజీఎఫ్ ఫేం రవి బస్రూర్ సంగీతం అందించారు. ఈ యాక్షన్-ప్యాక్డ్ డ్రామా పాన్-ఇండియన్ హిట్ గా నిలుస్తుందా లేదా? అన్న‌ది వేచి చూడాలి.