ఆ వ్యాఖ్య‌లు త‌ప్పే అంటున్న శ్రీనివాస‌రెడ్డి

వివాదాల‌కు దూరంగా ఉండే క‌మెడియ‌న్ శ్రీనివాస‌రెడ్డి ఈ మధ్య మీడియా మీద విమ‌ర్శ‌లు చేసి వార్త‌ల్లోకెక్కాడు. ‘అఆ’ సినిమాకు వ‌చ్చిన కొన్ని రివ్యూల్లో కొంద‌రు న‌టుల గురించి వ్య‌తిరేకంగా రాశారంటూ విమ‌ర్శ‌లు గుప్పించాడు. ఐతే మొత్తం మీడియా మీద అత‌ను విమ‌ర్శ‌లు చేయ‌డం వివాదాస్ప‌ద‌మైంది. దీని వ‌ల్ల అన‌వ‌స‌రంగా వార్త‌ల్లోకి ఎక్కాడత‌ను. ఐతే తాను ఆ వ్యాఖ్య‌లు త‌ప్పేన‌ని శ్రీనివాస‌రెడ్డి అన్నాడు. తాను క‌థానాయ‌కుడిగా తెర‌కెక్కిన ‘జ‌య‌మ్ము నిశ్చ‌య‌మ్మురా’ ప్ర‌మోష‌న్ల‌లో భాగంగా మీడియాతో మాట్లాడుతూ శ్రీనివాస‌రెడ్డి ఈ వ్యాఖ్య‌లు చేశాడు.

‘‘అఆ సినిమా రివ్యూల్లో ఆర్టిస్టుల గురించి రాస్తూ ఒకలిద్ద‌రు బాగా న‌టించ‌లేదు అని పేర్కొన్నారు. అది కూడా ఒక‌రో ఇద్ద‌రో అలా రాశారు. ఎవ‌రైతే బాగా న‌టించ‌లేదనుకుంటున్నారో వాళ్ల పేర్లు రాస్తే బాగుంటుంది క‌దా అన్న‌ట్టు మాట్లాడాను. ఆ త‌ర్వాత కూడా నా వ్యాఖ్య‌లపై వివ‌ర‌ణ ఇచ్చాను. ఏదేమైనా నేను అలా మాట్లాడి ఉండ‌కూడ‌దు. అది పూర్తిగా నా త‌ప్పే’’ అని శ్రీనివాస‌రెడ్డి అన్నాడు. ఇక ‘జ‌యమ్ము నిశ్చ‌య‌మ్మురా’ ఆహ్లాద‌క‌ర‌మైన సినిమా అని.. ప్రేక్ష‌కుల‌కు క‌చ్చితంగా న‌చ్చుతుంద‌ని చెప్పిన శ్రీనివాస‌రెడ్డి.. ఈ సినిమా త‌ర్వాత హీరోగా అవ‌కాశాలు వ‌స్తే చేస్తాన‌ని.. అలాగ‌ని క్యారెక్ట‌ర్ రోల్స్ మాత్రం వ‌దిలే ప్ర‌స‌క్తి లేద‌ని.. వాటి ద్వారానే త‌న‌కు మంచి పేరు వ‌చ్చింద‌ని చెప్పాడు.

Like Us on Facebook : https://www.facebook.com/Tupakidotcom/