సుధీర్ బాబుతో హ్యాట్రిక్ సినిమా అనౌన్స్ చేసిన డైరెక్టర్..!

సూపర్ స్టార్ కృష్ణ అల్లుడిగా.. మహేష్ బాబు బావగా సినీ ఇండస్ట్రీలో అడుగుపెట్టాడు సుధీర్ బాబు. 'ప్రేమ కథా చిత్రమ్' 'కృష్ణమ్మ కలిపింది ఇద్దరినీ' 'భలే మంచి రోజు' 'భాగీ' 'శమంతకమణి' 'సమ్మోహనం' సినిమాలతో ప్రేక్షకులను మెప్పించాడు. అయితే వీటిలో 'సమ్మోహనం' సినిమా సుధీర్ బాబు కెరీర్ లో ప్రత్యేకంగా నిలుస్తుందని చెప్పవచ్చు. ఇంద్రగంటి మోహనకృష్ణ దర్శకత్వంలో వచ్చిన ఈ సినిమా సూపర్ సక్సెస్ అయింది. ఈ క్రమంలో వీరిద్దరూ కలిసి 'వి' సినిమా చేశారు. ఇది ఆశించిన స్థాయిలో ఆకట్టుకోలేకపోయినప్పటికీ సుధీర్ బాబు కి మంచి పేరు తెచ్చిపెట్టింది. ఇప్పుడు సుధీర్‌ బాబు హీరోగా మోహనకృష్ణ ఇంద్రగంటి మరో చిత్రం చేయబోతున్నారు.

దీపావళి పండుగ సందర్భాన్ని పురష్కరించుకుని ఈ ప్రాజెక్ట్ ని అధికారికంగా ప్రకటించారు. సుధీర్‌ బాబు సమర్పణలో బెంచ్ మార్క్ స్టూడియోస్ బ్యానర్ పై ప్రొడక్షన్ నెం.1 గా రానున్న ఈ చిత్రాన్ని బి.మహేంద్రబాబు - కిరణ్‌ బాలపల్లి నిర్మించనున్నారు. 'ఉప్పెన' ఫేమ్‌ కృతి శెట్టి ఇందులో హీరోయిన్‌ గా నటించనుంది. ఇంద్రగంటి ఆస్థాన ఛాయాగ్రాహకుడు పి.జి.విందా సినిమాటోగ్రఫీ అందించనున్నారు. వివేక్‌ సాగర్‌ సంగీతం సమకూర్చనున్నారు. సుధీర్ బాబు కెరీర్ లో 14వ చిత్రంగా వస్తున్న ఈ సినిమా రొమాంటిక్ డ్రామాగా రూపొందించనున్నారు. ఈ ప్రాజెక్ట్ త్వరలోనే సెట్స్‌ పైకి వెళ్లనుంది. సుధీర్ - ఇంద్రగంటి కాంబోలో వస్తున్న ఈ హ్యాట్రిక్ మూవీ ఏ స్థాయి విజయాన్ని అందుకుంటుందో చూడాలి.