సుకుమార్ ఊర మాసండోయ్

దర్శకుడు సుకుమార్ చూడ్డానికి చాలా సుకుమారంగా కనిపిస్తాడు కానీ.. ఆయనలో మాస్ లక్షణాలు చాలా ఉన్నాయని ‘రంగస్థలం’ సినిమా ప్రయాణంలోనే జనాలకు అర్థమవుతోంది. ఈ సినిమా షూటింగ్ స్పాట్లో సుకుమార్ ఫైట్ మాస్టర్లు రామ్-లక్ష్మణ్ లతో కలిసి ఊర మాస్ స్టెప్పులేసి అలరించిన సంగతి తలిసిందే. ఆ తర్వాత ‘రంగస్థలం’ విజయానంతరం తన భార్యతో కలిసి సుక్కు డ్యాన్స్ చేసిన వీడియో ఒకటి సోషల్ మీడియాలో హల్ చల్ చేసింది. ఐతే ఇలా చాటుగా డ్యాన్సులేయడం కాదు.. తాజాగా అతను ‘రంగస్థలం’ సక్సెస్ మీట్లో వీర లెవెల్లో మాస్ స్టెప్పులేసి అందరినీ ఆశ్చర్యపరిచాడు.

దర్శకుడంటే సైలెంటుగా ఉండాలని.. వేదికల మీద కూడా చాలా పద్ధతిగా కనిపించాలని ఉన్న అభిప్రాయాల్ని సుకుమార్ మార్చేశాడు. ‘రంగస్థలం’ సక్సెస్ మీట్లో ముందు రామ్-లక్ష్మణ్ వేదిక ఎక్కి డ్యాన్స్ చేయగా.. తర్వాత సుకుమార్ కూడా వాళ్లకు జత కలిశాడు. జానీ మాస్టర్ కడా వాళ్లకు తోడయ్యాడు. నలుగురూ కలిసి ఊర మాస్ స్టెప్పులతో అలరించారు. సుకుమార్ ఏ తడబాటూ లేకుండా డ్యాన్స్ అదరగొట్టేశాడు. ముఖ్యంగా పంచె తిప్పుతూ వేసిన స్టెప్ అయితే సూపరసలు. కాసేపటికే రామ్ చరణ్ వస్తే.. అతడిని కూడా వేదిక మీదికి రప్పించాడు సుక్కు. ఇలా ఒక అగ్ర దర్శకుడు తాను డ్యాన్స్ చేస్తూ హీరోను వేదిక మీదికి పిలవడం.. అతను మొహమాట పడటం అరుదైన దృశ్యమనే చెప్పాలి. సుకుమార్ బలవంతం మీద పైకి వచ్చిన రామ్ చరణ్ ‘జిగేల్ రాణి’ పాటకు తనదైన శైలిలో స్టెప్ వేసి అలరించాడు. ఆ సమయంలో మిగతా యూనిట్ సభ్యులందరూ కూడా వేదిక మీదికి చేరిపోయారు. ఈ సందర్భంగా గీత రచయిత చంద్రబోస్ సైతం స్టెప్ వేయడం విశేషం.