ఇప్పుడు హార్రర్ కామెడీ ఏంటి నానా?

ఏడెనిమిదేళ్లుగా హీరోగా నిలదొక్కుకోవడానికి పోరాడుతున్నాడు యువ కథానాయకుడు సుమంత్ అశ్విన్. కానీ ఫలితం లేదు. ‘అంతకుముందు ఆ తరువాత’ లాంటి సినిమాలో కొంచెం పేరు.. ఊపు తెచ్చాయి కానీ.. అతను సద్వినియోగం చేసుకోలేకపోయాడు. చెత్త చెత్త సినిమాలు చేసి హీరోగా ఉనికి కోల్పోయాడు. ఇప్పుడు ‘యువి క్రియేషన్స్’ లాంటి పెద్ద బేనర్లో కొణిదెల నీహారికతో కలిసి ‘హ్యాపీ వెడ్డింగ్’ అనే సినిమా చేస్తున్నాడు. ఈ సినిమా మొదలవుతున్నట్లు ప్రకటన ఇచ్చారంతే. ఆ తర్వాత ఏ సమాచారం లేదు. దీనికి అంతగా బజ్ కూడా లేదు. ఆ సినిమా విడుదలైతే కానీ సుమంత్ కెరీర్ ఎలా ఉంటుందో తెలియదు. ఈలోపు కుర్రాడికి మరో సినిమాలో అవకాశం వచ్చింది. ‘ప్రేమకథా చిత్రమ్’ సీక్వెల్లో అతను హీరోగా నటిస్తున్నాడు.

‘ప్రేమకథా చిత్రమ్’ చిత్రాన్ని నిర్మించిన సుదర్శన్ రెడ్డే ఈ చిత్రానికి దర్శక నిర్మాత అట. ఐతే మారుతి దర్శకత్వ పర్యవేక్షణలో ఆరేళ్ల కిందట వచ్చిన ఈ చిత్రానికి ఇప్పుడు సీక్వెల్ ఏంటో అర్థం కావడం లేదు. హార్రర్ కామెడీల ట్రెండుకు ఎప్పుడో తెరపడింది. ఆ జానర్ని పీల్చి పిప్పి చేసేశారు. పైగా ‘ప్రేమ కథా చిత్రమ్’ సీక్వెల్ మారుతి తీస్తే ఓకే కానీ.. ఆ చిత్రాన్ని ప్రొడ్యూస్ చేసిన వ్యక్తి డైరెక్షన్ చేయడమేంటో అర్థం కావడం లేదు. అసలే బజ్ లేని హీరో.. పైగా ప్రొడ్యూుసర్ డైరెక్షన్ చేస్తున్నాడు. పైగా ఔట్ డేట్ అయిపోయిన జానర్. ఈ నేపథ్యంలో ఈ సినిమాపై ప్రేక్షకుల్లో ఏమంత ఆసక్తి కనిపించే పరిస్థితి లేదు. ఐతే సుమంత్ అశ్విన్ తండ్రి ఎమ్మెస్ రాజు మాత్రం ఈ ప్రాజెక్టును నమ్మి కొడుకును అప్పగించేశారు. మరి సుమంత్ కెరీర్ కు ఈ చిత్రం ఏమాత్రం ఊపునిస్తుందో చూద్దాం.