స్పెర్మ్ డొనేషన్‌ చేస్తే..జనాలు డబ్బులిస్తారా???

భారతీయ సినీ పరిశ్రమలో చాలా అడ్వాన్డ్స్ గా ఉండే ఇండస్ట్రీ బాలీవుడ్. వాళ్ల మార్కెట్ చాలా పెద్దది కాబట్టి.. కేవలం మల్టీప్లెక్స్ ఆడియన్స్ ని టార్గెట్ చేసి సినిమా తీసినా బండి నడిచిపోతుంది కాబట్టి అక్కడ ప్రయోగాలు చేయడానికి బాగా అవకాశముంటుంది. ఆ కోవలో జాన్ అబ్రహాం నిర్మాతగా మారి చేసిన సెన్సేషనల్ ప్రయోగం.. విక్కీ డోనర్. వీర్య దానం (స్పెర్మ్ డొనేషన్) నేపథ్యంలో సూజిత్ సర్కార్ తీసిన ఈ సినిమా బాలీవుడ్ కు దిమ్మదిరిగే షాకిచ్చింది. ఓ వర్గం ప్రేక్షకులకే నచ్చుతుందనుకున్న ఈ సినిమా.. అన్ని వర్గాల ప్రేక్షకుల్నీ ఆకట్టుకుని సెన్సేషనల్ హిట్టయింది. రూ.5 కోట్ల బడ్జెట్ తో తెరకెక్కి రూ.50 కోట్ల దాకా వసూలు చేసింది.

ఐతే బాలీవుడ్ లో కాబట్టి ఈ సినిమా నడిచింది కానీ.. సౌత్ లో ఇది వర్కవుట్ కాదేమో అనుకున్నారు కానీ మన తెలుగు హీరో సుమంత్ మాత్రం ధైర్యంగా ఈ చిత్రాన్ని రీమేక్ చేయడానికి ముందుకొచ్చాడు. చాన్నాళ్ల కిందటే ఈ వార్త బయటికి వచ్చింది కానీ.. ఈ ప్రాజెక్టు గురించి మళ్లీ అప్ డేట్స్ ఏమీ లేకపోవడంతో పక్కనబెట్టేశారేమో అన్న సందేహాలు నెలకొన్నాయి. కానీ తాజా సమాచారం ఏంటంటే.. విక్కీ డోనర్ తెలుగులోకి రీమేక్ అవుతోంది. మల్లిక్ రామ్ అనే కొత్త దర్శకుడు ఈ చిత్రాన్ని రూపొందించబోతున్నాడు. అతనిప్పటికే స్క్రిప్టు రెడీ చేశాడు. హిందీలో హీరో పంజాబీ అయితే, హీరోయిన్ని బెంగాలీగా చూపించారు. వీళ్లిద్దరి మధ్య కల్చరల్ డిఫరెన్సెస్ గురించి సినిమాలో చర్చ నడుస్తుంది. ఈ ఎపిసోడ్ ను తెలుగు నేటివిటీకి తగ్గట్లు మార్చారట. సుమంత్ స్వయంగా నిర్మించే ఈ సినిమా కోసం హీరోయిన్ వేటలో ఉన్నారు.  త్వరలోనే ఈ చిత్రం సెట్స్ మీదికి వెళ్తుంది.