తేజ మళ్లీ అతడికి లైఫ్ ఇస్తాడా?

తెలుగులో బ్రహ్మానందం తర్వాత కమెడియన్ గా ఆ స్థాయిలో ఇమేజ్ సంపాదించిన నటుడు సునీల్. ఒక టైంలో బ్రహ్మానందం సహా అందరినీ వెనక్కి నెట్టేసి స్టార్ కమెడియన్ గా ఒక వెలుగు వెలిగాడు సునీల్. ఐతే మొదట్లో ‘నువ్వే కావాలి’ లాంటి సినిమాల్లో పెద్దగా గుర్తింపు లేని పాత్రలు చేసిన సునీల్ కు లైఫ్ ఇచ్చింది సీనియర్ దర్శకుడు తేజ. ‘నువ్వు నేను’ సినిమాలో సునీల్ పాత్రతో ఆయన పండించిన కామెడీ అప్పట్లో భలేగా పేలింది. ఆ సినిమాతో సునీల్ దశ తిరిగిపోయింది. ఆ తర్వాత వెనుదిరిగి చూడలేదు సునీల్.

ఐతే తేజ నిర్మాణంలో వచ్చిన ‘సంబరం’ సినిమాలో హీరో ఫ్రెండు పాత్రకు సునీల్ ను అనుకోగా.. అతను ఈ సినిమాకు ఇచ్చిన డేట్లను ‘మన్మథుడు’ కోసం మళ్లించి తేజ ఆగ్రహానికి గురయ్యాడు. అప్పట్లో ఇది వివాదం రాజేసింది. అప్పట్నుంచి తేజ మళ్లీ సునీల్ తో కలిసి పని చేయలేదు. సునీల్ పాటికి సునీల్ పెద్ద పెద్ద సినిమాల్లో నటిస్తూ పెద్ద రేంజికి వెళ్లిపోయాడు.

అక్కడ కట్ చేస్తే.. ఇప్పుడు సునీల్ పరిస్థితి దయనీయంగా ఉంది. కామెడీ వేషాలు వదిలేసి హీరో పాత్రలకు మళ్లిన సునీల్.. వరుస ఫ్లాపులతో పూర్తిగా ఆదరణ కోల్పోయాడు. ఇప్పుడు రెంటికీ చెడ్డ రేవడిలా అయింది అతడి పరిస్థితి. ఈ పరిస్థితుల్లో మళ్లీ కామెడీ పాత్రలు చేయడానికి రెడీ అవుతున్నాడతను. ఆల్రెడీ రవితేజ-శ్రీను వైట్ల సినిమాలో కామెడీ రోల్ అంగీకరించాడు. దీంతో పాటుగా తేజ-వెంకటేష్ కాంబినేషన్లో తెరకెక్కనున్న కొత్త సినిమాలోనూ సునీల్ కు అవకాశం వచ్చినట్లు సమాచారం. పాత విభేదాల్ని పక్కన పెట్టి సునీల్ కోసం ఒక పాత్ర ఇస్తున్నాడట తేజ. మరి అతను మరోసారి సునీల్ కు లైఫ్ ఇస్తాడేమో చూడాలి.