గోల్డెన్ స్టార్ సునీల్‌.. ఎందుకిలా?

సునీల్‌ హీరో వేషాలకే ఎందుకు పరిమితమవుతున్నాడు.. అన్న ప్రశ్న అతణ్ని కమెడియన్‌గా అభిమానించే జనాల మనసుల్ని చాన్నాళ్లుగా తొలిచేస్తూనే ఉంది. సునీల్‌ ను హీరోగా ఇష్టపడతారా.. కమెడియన్‌ గా ఇష్టపడతారా అని పోల్ పెడితే మెజారిటీ జనాలు రెండోదానికే ఓటేస్తారనడంలో ఎవ్వరికీ సందేహాల్లేవు. సునీల్‌ హీరోగా కంటిన్యూ అయ్యే విషయంలో వ్యతిరేకత వస్తున్నా.. హీరోగా చేస్తున్న సినిమాలు వరుసగా బోల్తా కొడుతున్నా... సునీల్ మాత్రం రూటు మార్చుకోవట్లేదు. అవకాశాలు వస్తున్నాయి కాబట్టి హీరోగానే కంటిన్యూ అవుతున్నాడు. హీరోగా కంటిన్యూ అయ్యే విషయంలో అతడికుండే సౌకర్యాలు అతడికున్నాయి. ఈ విషయంలో తను కొన్ని లాజిక్కులు కూడా చెప్పాడు ఆ మధ్య.

ఐతే హీరోగా చేస్తే చేశాడు కానీ.. తనను తాను పెద్ద మాస్ హీరోగా ప్రొజెక్ట్ చేసుకోవడానికి ఎందుకు ఆరాటపడుతున్నాడు అన్నదే అర్థం కాని విషయం. ‘కృష్ణాష్టమి’లో తనకు నప్పని మాస్ వేషాలతో సునీల్ ఎంతగా ఇబ్బంది పెట్టాడో అందరూ చూశారు. అవన్నీ చాలవన్నట్లు టైటిల్స్ లో ‘గోల్డెన్ స్టార్’ సునీల్ అని వేయించుకోవడం టూమచ్ అనిపించింది జనాలకు. ఏదో ఓ సినిమాకు అలా ట్యాగ్ లైన్ వేసుకుని ముచ్చటపడితే పడ్డాడులే అనుకుంటే.. నిన్న తన కొత్త సినిమా ఓపెనింగ్ సందర్భంగా జనాలకు మరోసారి షాకిచ్చాడు సునీల్. ఈ సినిమాకు సంబంధించిన ప్రెస్ నోట్లో ‘గోల్డెన్ స్టార్’ సునీల్ అంటూ మొదలుపెట్టారు. ఇది సునీల్ ప్రమేయం లేకుండా జరిగి ఉంటుందని అనుకోవడానికి వీల్లేదు. అంటే సునీల్ తనకు తాను పెద్ద స్టార్ అని ఫిక్సయిపోయినట్లున్నాడు. ఇకముందు కూడా తన పేరు ముందు ‘గోల్డెన్ స్టార్’ బిరుదు కొనసాగుతుందని చెప్పకనే చెప్పినట్లున్నాడు. సునీల్ అంతగా ముచ్చటపడుతుంటే ఏం చేస్తా మరి?